ছাইদুল ইছলাম
ডিফু : সমগ্ৰ ভাৰতৰ লগত সংগতি ৰাখি পাহাৰীয়া জিলা কাৰবি আংলঙতো ৩২ সংখ্যক পথ সুৰক্ষা সপ্তাহ ২০২১ পালন কৰাৰ প্ৰস্তুতি চলোৱা হৈছে ৷ এই উপলক্ষে আজি জিলা পৰিবহন বিভাগ উদ্যোগত আৰু জিলা আৰক্ষীৰ সহযোগত ডিফু ক্লাৱত পথ সুৰক্ষা সপ্তাহৰ শুভাৰম্ভ কৰা হয় ৷ আৰম্ভনি কাৰ্যসূচী হিচাপে আজি পুৱাৰ ভাগত “বুলছ অফ আছাম”ৰ জৰিয়তে ডিফুৰ পৰা মাঞ্জালৈ মটৰ চাইকেল ৰেলী উলিয়ায় ৷ জিলা পৰিবহন বিষয়া বিক্ৰমাদিত্য গগৈ আৰু এমভিআই হৰিমোহন শইকীয়া আৰু এনফৰ্চমেণ্ট বিষয়া সকলৰ উদ্যোগত জিলা অতিৰিক্ত আৰক্ষী বিষয়া ইন্দ্ৰনীল বৰুৱাই বাইক ৰেলীৰ ফ্লেগ অফ কৰি পথ সুৰক্ষা সপ্তাহৰ শুভাৰম্ভ কৰে ৷ এই সন্দৰ্ভত জিলা পৰিবহন বিষয়া বিক্ৰমাদিত্য গগৈয়ে সাংবাদ মাধ্যমক সম্বোধন কৰি কয়যে, ভাৰতৰ পৰিবহন মন্ত্ৰালয়ৰ নিৰ্দেশ মৰ্মে “পথ সুৰক্ষাই জীৱন সুৰক্ষা”ক থীম হিচাপে লৈ মাহজোৰা পথ সুৰক্ষা কাৰ্যসূচী পালন কৰা হব, লগতে সমাজৰ সৰ্বস্তৰতে পথ সুৰক্ষা সন্দৰ্ভত সজাগতা গঢ়ি তোলা হ’ব বুলি জনায় ৷
ইয়াৰোপৰি সৰ্বস্তৰৰ সজাগতাৰ বাবে অংগনৱাড়ী কৰ্মী সকলকো নিয়োগ কৰা হ’ব বুলি মন্তব্য কৰে ৷ পৰিবহন বিষয়াগৰাকীয়ে ইয়াকো জানিবলৈ দিয়ে যে কৰ’না মহামাৰীৰ মাজতে ২০২০ ইংৰাজী বৰ্ষটোত পাহাৰীয়া জিলাখনত মুঠ ৮৫টা পথ দুৰ্ঘটনা সংঘটিত হৈছে ৷ ইয়াৰে ৫৩ জনলোকে প্ৰাণ হেৰুৱাৰ লগতে ৪৯ লোক আহত হয় ৷ এনে দুৰ্ঘটনা প্ৰতিৰোধ কৰিবৰ বাবে মটৰ চাইকেল আৰোহীসকলৰ বাবে হেলমেট অতি জৰুৰী বুলি জনায় ৷
