ষ্টাফ ৰিপ’ৰ্টাৰ
ডিফু : পশ্চিম কাৰ্বি আংলং জিলাৰ জেংখাৰ পহৰা চকীত নিশা একাংশ উদণ্ড লোকে চলালে ভয়ংকৰ আক্ৰমণ। জেংখাত দেওবাৰে দিনজোৰা কাৰ্যসূচীৰে অনুষ্ঠিত হোৱা গাঁওৰক্ষী বাহিনীৰ ৭২ সংখ্যক প্ৰতিষ্ঠা দিৱসৰ সাংস্কৃতিক অনুষ্ঠানত উদ্ভণ্ডালি কৰা এজন যুৱকক আটক কৰাৰ পিছতে সৃষ্টি হৈ উত্তপ্ত পৰিস্থিতিৰ। যুৱকজনক মোকলাই নিয়াৰ উদ্দেশ্যৰে গাঁৱৰ ৰাইজে পহৰা চকীত চলালে এক ভয়ংকৰ আক্ৰমণ। ৰাইজে আক্ৰমণ কৰি লণ্ডভণ্ড কৰে থানাখনৰ আচৱাব-পত্ৰসমূহ। লগতে ভাঙি চূৰ্ণ-বিচূৰ্ণ কৰে আৰক্ষীৰ AS-30-7734 নম্বৰৰ বাহনখনো।
ইপিনে, ৰাইজে থানাত আক্ৰমণ কৰাৰ সময়ত বহুকেইজন আৰক্ষীৰ লোক আহত হোৱাৰ লগতে আহত হৈছে আক্ৰমনকাৰীও।
ইতিমধ্যে আৰক্ষীয়ে দুজন লোকক আটক কৰি তদন্ত অব্যাহত ৰাখিছে। নিশা গুলী ফুটাই পৰিস্থিতি নিয়ন্ত্ৰণ কৰা আৰক্ষীয়ে এই মুহূৰ্তলৈকে ঘটনা সংক্ৰান্তত প্ৰকাশ কৰা নাই কোনো ধৰণৰ মন্তব্য। কিন্তু নিশাৰ ঘটনাত ৯জনকৈ আৰক্ষীলোকৰ আঘাতপ্ৰাপ্ত হয়৷ নিশাৰ ঘটনাক লৈ অঞ্চলটোত অব্যাহত আছে চেপা উত্তেজনা। ঘটনাস্থলীত হামৰেণ আৰক্ষী অধীক্ষকগৰাকী উপস্থিত হৈ ঘটনাৰ সবিশেষ তদন্ত অব্যাহত ৰাখিছে৷
