ষ্টাফ ৰিপ’ৰ্টাৰ
ডিফু : সাহিত্য সৌৰভ বিলাই আজি কাৰবি আংলঙত উন্মোচিত কেইবাখনো মুল্যৱান গ্ৰন্থ ৷ কার্বিসকলৰ ভাষা-সাহিত্যৰ প্রতি অনবদ্য বৰঙণিৰ চানেকী ৰাখি থৈ আজি জিলাখনৰ সদৰ চহৰ ডিফুত উন্মোচন কৰা হয় এই গ্ৰন্থসমূহ ৷ এই উদ্দেশ্যে, আজি দিনৰ এঘাৰ বজাত ডিফুৰ লৰুলাংছস্থিত ৰাংছিনা চাৰপ’ সাংস্কৃতিক ভৱনত আনন্দৰাম বৰুবা ইনষ্টিটিউট অৱ লেংগুৱেজ, আর্ট এণ্ড কালছাৰৰ দ্বাৰা প্রকাশিত গ্রন্থকেইখনৰ শুভ উন্মোচনৰ বাবে এক বিশেষ অনুষ্ঠানৰ আয়োজন কৰা হয়।
উল্লেখযোগ্য যে, শেহতীয়াকৈ ভাষা-সাহিত্যৰ ক্ষেত্রত বিশেষ উত্তৰণৰ দিশত গতি কৰা কাৰ্বি ভাষাক অধিক সমৃদ্ধ কৰাৰ বাট প্রশস্ত কৰি বিশিষ্ট ভাষাবিদ, সাহিত্যিক খয়াছিং হাঞ্চেৰ সম্পাদনাত কাৰ্বি, অসমীয়া আৰু ইংৰাজী ভাষাত প্রকাশিত ত্ৰিভাষিক অভিধান কাৰ্বি লামতাচাম’, কবিগুৰু ৰবীন্দ্রনাথ ঠাকুৰৰ নোবেল বঁটাপ্রাপক কাব্যগ্রন্থ ‘গীতাঞ্জলি’ৰ সাহিত্যিক হাংমিজি হাঞ্চেই কৰা কাৰ্বি অনুবাদ, লংছিং টেৰণৰ প্রবন্ধ সংকলন নে লামথে’, লংকাম টেৰণ আৰু দিলীপ কুমাৰ কলিতাৰ অনুবাদ গ্রন্থ কার্বি ফক ছং আদি গ্রন্থৰ লগতে কাৰ্বি ভাষাত প্রকাশিত বিভিন্ন স্থানীয় চৰাই, জন্তু, ফুল, ঘৰুৱা ফুল, পোহনীয়া জস্তু, পতংগ, ফলমূল আৰু দেহৰ বিভিন্ন অংগৰ উল্লেখ থকা তালিকাও উন্মোচন কৰা হয়। গ্রন্থসমূহৰ উন্মোচনী সভাত মুখ্য অতিথি হিচাপে উপস্থিত থাকি প্রদান কৰা ভাষণত কার্বি আংলং স্বায়ত্তশাসিত পৰিষদৰ মুখ্য কার্যবাহীগৰাকীয়ে ত্রিভাষিক অভিধানখনৰ প্রকাশে কার্বি ভাষা শিকাৰ বাবে আগ্রহী বিভিন্নজনৰ বাবে অতিকে সহায়ক হ’ব বুলি আশা প্রকাশ কৰে।
আজিৰ এই গুৰত্বপূর্ণ সভাখনত উপস্থিত থাকি আনন্দ প্রকাশ কৰে অসম সাহিত্য সভাৰ প্রাক্তন সভাপতি তথা বিশিষ্ট সাহিত্যিক পদ্মশ্রী ৰংবং তেৰাঙে। আজিৰ দিনটো কার্বি আংলং জিলাৰ বাবে এক মহত্বৰ দিন বুলি মন্তব্য কৰি খয়াছিং হাঞ্চেৰ নৱতম ত্রিভাষিক অভিধানখন কার্বি ভাষা-সাহিত্যৰ বাবে এক বহুমুলীয়া অৱদান বুলি অভিহিত কৰে। অভিধানখনৰ বিজ্ঞানসম্মত ভাষাবিজ্ঞানৰ ব্যাখ্যাৰ বাবে খয়াছিং হাঞ্চেই বিশ বছৰ শ্রম কৰিবলগীয়া হৈছিল বুলি মন্তব্য কৰি কাৰ্বি ভাষাৰ উন্নতিৰ বাবে এয়া এক বৃহৎ সােপান বুলি মস্তব্য কৰে।
আনহাতে, কবি ঠাকুৰৰ গীতাঞ্জলিৰ কার্বি অনুবাদ হোৱাত গভীৰ সন্তুষ্টি প্রকাশ কৰি গীতাঞ্জলিৰ দৰে এখন গ্রন্থ কার্বি ভাষাত কবিতাৰ আকাৰে প্রকাশ পোৱা কার্যই কার্বি ভাষাতো যে এক অতিকে চহকী সেয়াই প্রতিপন্ন কৰে বুলি মন্তব্য কৰে। সহিত্যিক হাংমিজি হাঞ্চেৰ বাবেও এয়া এক বৃহৎ সাফল্য বুলি বিশিষ্ট সাহিত্যিকগৰাকীয়ে কয়। গ্রন্থকেইখন প্রকাশৰ ক্ষেত্রত লোৱা পদক্ষেপৰ বাবে ‘এবিলাক’ৰ সঞ্চালক ডঃ দিলীপ কলিতাকো অভিনন্দন জ্ঞাপন কৰে।
