ষ্টাফ ৰিপ’ৰ্টাৰ
ডিফু : উত্তৰ বৰবিল উপ-আৰক্ষী চকীৰ অন্তৰ্গত তাৰাবাচাত আজি পুৱাৰ ভাগত সংঘটিত হোৱা এক ভয়ংকৰ পথ দুৰ্ঘটনাত এগৰাকী বৃদ্ধাকে ধৰি দুগৰাকী মহিলা অতি গুৰুতৰভাৱে আহত হয়। ঘটনাৰ বিৱৰণ অনুসৰি আজি পুৱা প্ৰায় ৯ বজাত তাৰাবাচাৰ গেছ এজেঞ্চিৰ সমীপত ৩৬নং ৰাষ্ট্ৰীয় ঘাইপথৰ ওপৰত এম.এন-০৬-টি-০৭৩৪ নম্বৰৰ তেল পৰিবাহী টেংকাৰখনৰ সৈতে এখন নম্বৰ প্লেটবিহীন স্কুটীৰ মুখামুখি সংঘৰ্ষ হয় ।
দুৰ্ঘটনাটোত এগৰাকী বৃদ্ধাকে ধৰি স্কুটীখনৰ দুয়োগৰাকী মহিলা আৰোহী অতি গুৰুতৰভাৱে আহত হয় । আহত মহিলা দুগৰাকী তাৰাবাচা সোণাৰি তেৰাং গাঁও নিবাসী চেমাৰ ইংতিপী (৩৬) আৰু চিকা বে’পী (৭৫) বুলি জানিব পৰা গৈছে। আহত দুয়োকে বকলীয়াঘাট প্ৰাথমিক চিকিৎসালয়ত ভৰ্ত্তি কৰোৱা হয় যদিও উন্নত চিকিৎসাৰ বাবে দুয়োকে লগে লগে ডিফু চিকিৎসা মহাবিদ্যালয়লৈ প্ৰেৰণ কৰা হয়।
