ষ্টাফ ৰিপ’ৰ্টাৰ
ডিফু : ষ্টেট বেঙ্ক অৱ ইণ্ডিয়া নগাওঁ আঞ্চলিকৰ উদ্যোগত আৰু ডিফু শাখা কাৰ্যালয়ৰ সহযোগত আজি ডিফু চিকিৎসা মহাবিদ্যালয়ৰ ক’ভিড আইচিইউ ৱাৰ্ডত ক’ভিডৰ লগত জড়িত চিকিৎসা সামগ্ৰী প্ৰদান কৰে ৷ ডিফু চিকিৎসা মহাবিদ্যালয়ৰ একাডেমিক ব্লকত মহাবিদ্যালয়খনৰ অধ্যক্ষা সুমিত্ৰা হেগজেৰৰ হাতত চিকিৎসা সামগ্ৰীখিনি অৰ্পণ কৰে ষ্টেট বেঙ্ক অফ ইণ্ডিয়াৰ ডিফু শাখা কাৰ্যালয়ৰ কৰ্তৃপক্ষই ৷ ডিফু শাখা কাৰ্যালয়ৰ মুখ্য প্ৰৱন্ধক নিৰজ কুমাৰ, এলডিএম ৰাজ্যজিৎ সাহা, বিশেষ সহায়ক গৌতম কুমাৰ ৰয় আৰু জ্যেষ্ঠ সহায়ক ঘণশ্যাম টেৰণে উক্ত কাৰ্যসূচীত উপস্থিত থাকে ৷ ডিফু চিকিৎসা মহাবিদ্যালয়ৰ অধ্যক্ষা সুমিত্ৰা হেগজেৰে ষ্টেট বেঙ্কৰ এনে মহৎ কামৰ বাবে এছবিআইলৈ কৃতজ্ঞতা প্ৰকাশ কৰে ৷
সাংবাদিকৰ সৈতে হোৱা বাৰ্তালাপত এছবিআইৰ ডিফু শাখাৰ মুখ্য প্ৰৱন্ধক নিৰজ কুমাৰে কয় যে, মানুহৰ স্বাস্থ্যৰ প্ৰতি ভাবুকি স্বৰূপহৈ পৰা বিশ্বব্যাপী ক’ভিড সংক্ৰমনৰ ভয়াবহতাৰ প্ৰতি ও আপদকালীন অৱস্থাত নিজৰ সামাজিক দায়বদ্ধতা নিষ্ঠা সহকাৰে সম্পন্ন কৰি আহিছে বুলি কয় ৷ সামৰ্থ অনুযায়ী এম্বুলেঞ্চৰ পৰা আৰম্ভ কৰি বিভিন্ন চিকিৎসা সামগ্ৰী প্ৰদান কৰি আহিছে ৷ গুৱাহাটী চিকিৎসা মহা বিদ্যালয়তো এছবিআইৰ মুখ্য মহা প্ৰৱন্ধকে ১২০ খন আইচিইউ বিছনা প্ৰদান কৰিছে বুলি কয় ৷
ইয়াৰ লগত সংগতি ৰাখি ডিফু চিকিৎসা মহাবিদ্যালয়ৰ ক’ভিড আইচিইউলৈ চিকিৎসা সামগ্ৰী সমূহ প্ৰদান কৰা হয় ৷ সামাজিক দায়বদ্ধতাৰ প্ৰতি এছবিআইৰ কাৰ্যকলাপ ভৱিষ্যতলৈও অব্যাহত থাকিব বুলি মন্তব্য কৰে মুখ্য প্ৰৱন্ধকগৰাকীয়ে ৷ এছবি আইৰ এনে কাৰ্যক সচেতন মহলে উচ্চ প্ৰশংসা কৰিছে ৷
