ষ্টাফ ৰিপ’ৰ্টাৰ
ডিফু : ড্ৰাগছৰ বিৰুদ্ধে কাৰবি আংলং আৰক্ষীয়ে অব্যাহত ৰাখিছে ধাৰাবাহিক সফল অভিযান ৷ অসম-নাগালেণ্ড সীমান্তঞ্চলৰ লাহৰিজানত আজি চিআৰপিএফ আৰু আৰক্ষীয়ে এক যুটীয়া অভিযান চলাই বুজন পৰিমাণৰ সন্দেহযুক্ত হেৰইনসহ ড্ৰাগছ সৰবৰাহকাৰী এগৰাকী মহিলাকে ধৰি দুজন ড্ৰাগছ সৰবৰাহকাৰীক গ্ৰেপ্তাৰ কৰিবলৈ সক্ষম হৈছে ৷ এই সন্দৰ্ভত আৰক্ষী সূত্ৰে লাভ কৰা তথ্য অনুসৰি এক নিৰ্ভৰযোগ্য সূত্ৰৰ পম খেদি বোকাজান মহকুমা আৰক্ষী বিষয়া জন দাস, খটখটী আৰক্ষী থানাৰ ভাৰপ্ৰাপ্ত বিষয়া মৌবলিক ব্ৰক্ষ্ম আৰু উপ-পৰিদৰ্শক মৃদুল ৰুদ্ৰ পালৰ নেতৃত্বত চিআৰপিএফ আৰু আৰক্ষীৰ এটা দলে আজি বিয়লি ৪ বজাত খটখটী থানাৰ অন্তৰ্গত লাহৰিজানত ড্ৰাগছ বিৰোধী অভিযান চলায় ৷
উক্ত অভিযানত দলটোৱে চাবোনৰ বাকচত ভৰাই অনা অৱস্থাত ৬০ গ্ৰাম ওজনৰ সন্দেহযুক্ত হেৰইন জব্দ কৰিবলৈ সক্ষম হয় ৷ গ্ৰেপ্তাৰ হোৱা ড্ৰাগছ সৰবৰাহকাৰী দুটা ক্ৰমে, ডিমাপুৰ ইষ্টৰ বাৰ্মা কেম্পৰ কানহিয়া চাফি(২৪) আৰু অৰ্চনা বৰ্মন (২৮) বুলি চিনাক্ত কৰা হৈছে ৷ জব্দ হোৱা ড্ৰাগছখিনি মহিলাগৰাকীৰ হাতত থকা সৰু এটা বেগত লুকুৱাই অনা হৈছিল বুলি জানিব পৰা গৈছে ৷ জব্দ হোৱা ড্ৰাগছখিনিৰ বজাৰমূল্য কমপক্ষেও দহ লক্ষ্যাধিক টকা হ’ব বুলি অনুমান কৰা হৈছে ৷
