ষ্টাফ ৰিপ’ৰ্টাৰ
অসম জাতীয়তাবাদী যুৱ-ছাত্ৰ পৰিষদৰ মুখ্য কাৰ্যালয়ত মন্ত্ৰী অতুল বৰা। যুৱ-ছাত্ৰ পৰিষদৰ নেতৃত্বৰে অসম চুক্তি ৰূপায়ণ বিভাগৰ মন্ত্ৰী বৰা মিলিত হয় অনানুষ্ঠানিক বৈঠকত।
অসম চুক্তি ৰূপায়ণ সন্দৰ্ভত মন্ত্ৰী বৰাক দিহা-পৰামৰ্শ আগবঢ়াই সংগঠনৰ নেতৃত্বই। চুক্তি ৰূপায়ণ সন্দৰ্ভত সহযোগিতা আগবঢ়োৱা আশ্বাস দিয়ে মন্ত্ৰীগৰাকীক। যুৱ-ছাত্ৰ পৰিষদে মন্ত্ৰীগৰাকীক অসম চুক্তি কাৰ্যকৰী সন্দৰ্ভত স্মাৰক-পত্ৰ প্ৰদান কৰে।
ইফালে এনআৰচিৰ পুনৰীক্ষণত চৰকাৰৰ দাবী প্ৰতি সমৰ্থন জনাব যুৱ-ছাত্ৰ পৰিষদে। কিন্তু তাৰ বাবে নিৰ্দিষ্ট সময়সীমা নিৰ্ধাৰণ কৰাৰো আহ্বান জনোৱা বুলি মন্ত্ৰী বৰাই কয়।
অসমৰ জাতীয় জীৱনৰ ভৱিষ্যত সুৰক্ষাৰ স্বাৰ্থত এখন আনুষ্ঠানিক আলোচনা আহ্বান জনায় যুৱ-ছাত্ৰ পৰিষদৰ- সভাপতি ৰাণা প্ৰতাপ বৰুৱাই।
৭১ চনৰ পাছত অহা বিদেশী চিনাক্ত আৰু বিতাৰণ কৰিব লাগে। লগতে সীমান্ত এশ শতাংশ চীলৰ দাবী কৰে সংগঠনটোৱে ।
চৰকাৰে দিয়া প্ৰতিশ্ৰুতি অনুসৰি নিৰ্দিষ্ট সময়ৰ ভিতৰত ৬নং দফা কাৰ্যকৰী কৰাৰ আহ্বান জনায় সংগঠনটো সম্পাদক- পলাশ চাংমাই।
আনহাতে কৃষি মন্ত্ৰী হিচাপেও মন্ত্ৰী বৰাক জাতীয় সংগঠনটোৱে কিছু দিহা-পৰামৰ্শ আগবঢ়াই। ক’ৰনাত বিধ্বস্ত কৃষকক মাটি খাজানা পৰা ৰেহাই দিবলৈও যুৱ-ছাত্ৰ পৰিষদে আহ্বান জনায় মন্ত্ৰীগৰাকীক।
অসম চুক্তি ৰূপায়ণ বাবে ভাৰত চৰকাৰৰ সহযোগিতা প্ৰয়োজন। ৬নং দফা ৰূপায়ণ বাবে পূৰ্বতে কোনো চৰকাৰে ব্যৱস্থা লোৱা নাছিল। কিন্তু যোৱা চৰকাৰখনে কমিটি গঠন কৰিছে। কমিটিৰ প্ৰতিবেদনৰ পাছতো বিষয়টো কিয় আগবঢ়া নাই তাৰ বাবে মুখ্যমন্ত্ৰী সৈতে বৈঠকত মিলিত হোৱা আশ্বাস দিয়ে মন্ত্ৰী বৰাই।
উল্লেখ যে মন্ত্ৰী বৰাই দায়িত্ব গ্ৰহণ কৰিয়েই সদৌ অসম ছাত্ৰ সন্থা কাৰ্যালয়তো আছু নেতৃত্বৰে মিলিত হৈছিল।
