ছাইদুল ইছলাম
ডিফু : তুলিৰাম ৰংহাঙৰ নেতৃত্বাধীন বিজেপি শাসিত কাৰবি আংলং স্বায়ত্তশাসিত পৰিষদৰ অধীনত পাহাৰীয়া জিলা দুখন ক্ৰমে, কাৰবি আংলং আৰু পশ্চিম কাৰবি আংলঙৰ অভূতপূৰ্ব উন্নয়ন হোৱা বুলি বিশেষ চৰ্চাৰ বিষয় হৈ থকাৰ সময়তে জিলাখনৰ চহৰ সদৰ চহৰ ডিফুৰ নিকটৱৰ্তী ডিফুৰ মাটিপুং সংযোগী ডিফু-দলদলী পথৰ শোচনীয় অৱস্থাই উন্নয়নৰ প্ৰকৃত স্বৰূপ পোহৰলৈ আহিছে ৷ শনিবাৰে স্থানীয় ৰাইজে প্ৰায় ২৫খন জনবসতিপূৰ্ণ গাঁৱৰে আগুৰা ডিফু-দলদলীৰ ঝুম কণ্ট্ৰ’ল পথৰ প্ৰায় ১০ কিল’মিটাৰ যোৰা পথ শ্ৰমদানেৰ মেৰামতি কৰি ৰাইজৰ যাতায়তৰ বাবে সুচল কৰি তোলা পৰিলক্ষিত হৈছে ৷
কাৰবি আংলং স্বায়ত্তশাসিত পৰিষদৰ অধীনস্থ ধনশিৰি পৰিষদীয় সমষ্টীৰ অন্তৰ্গত গড়কাপ্তানি পথটোৰ অধিকাংশই কেঁচা ৷ বাৰিষা কালত পথছোৱা বোকাময় হৈ পৰাৰ লগতে অত্যাধিক পিছল আৰু সৰু-বৰ গাঁতৰ সৃষ্টি যান-বাহন চলাচল আৰু পথচাৰীয়ে দীৰ্ঘ দিনৰ পৰা যমৰ যাতনা ভুগি আহিছে ৷ আজি সাংবাদিকৰ সৈতে হোৱা বাৰ্তালাপত স্থানীয় এগৰাকী সমাজ কৰ্মীয়ে কয় যে বিগতে ৪০ বছৰৰো ওপৰৰ কাল এএছডিচি, কংগ্ৰেছ আৰু শেহতীয়াকৈ ৫ বছৰ কাল বিজেপিয়ে কাৰবি আংলং স্বায়ত্তশাসিত পৰিষদত শাসন কৰি গ’ল যদিও ডিফু-দলদলীৰ ঝুম কণ্ট্ৰ’ল পথ এলাগী হৈ পৰি ৰ’ল ৷ চৰকাৰৰ কোনো আঁচনিয়ে ঢুকি নাপালে উক্ত পথৰ নামত ৷ স্থানীয় জনপ্ৰতিনিধি কাৰবি আংলং স্বায়ত্তশাসিত পৰিষদৰ ইএম প্ৰদীপ ডিফুচাৰ ওচৰত পথছোৱা নিৰ্মাণৰ বাবে আবেদন কৰিও সুফল পোৱা নাই ৷ ইএম গৰাকীয়ে সমষ্টিটোৰ উক্ত এলেকাবাসীক গুৰুত্বহীন কৰাকলৈ আক্ষেপ প্ৰকাশ কৰিছে স্থানীয় ৰাইজে ৷
আনহাতে উক্ত পথছোৱাৰ বাবে স্থানীয় ৰাইজে গড়কাপ্তানি বিভাগত বাৰম্বাৰ অনুনয়-বিনয় কৰি পথছোৱা মেৰামতি কৰাৰ লগতে পথছোৱাৰ দুয়োকাষে থকা হাবি-বনবোৰ পৰিষ্কাৰ কৰিবলৈ কাতৰ অনুৰোধ জনাইয়ো একো লাভ নহ’ল বুলি ক্ষোভ উজাৰে স্থানীয় ৰাইজে ৷ অৱশেষত বাৰিষা কালত ৰোগীৰ লগতে ছাত্ৰ-ছাত্ৰীৰ দুৰ্দশাৰ প্ৰতি লক্ষ্য ৰাখি স্থানীয় ৰাইজ উপায়হীন হৈ ডিফু পৌৰ নিগমৰ ১৩নং ৱাৰ্ড কমিচনাৰ ছিমন ফাংছক তৎকালীন বাবে কিবা ব্যৱস্থা ল’বলৈ অনুৰোধ জনোৱাত ৱাৰ্ড কমিচনাৰ গৰাকীয়ে লগে লগে সঁহাৰি জনাই পথ মেৰামতিৰ বাবে নিজ খৰছত এক্সকেভেটৰৰ সহায়ত পথছোৱা দুয়োকাষে হাবি বনবোৰ চাফা কৰাৰ লগতে পথছোৱা সমান কৰি ৰাবিছ পাৰি দিয়াৰ ব্যৱস্থা কৰে ৷ উক্ত কামত এলেকাটোৰ স্থানীয় ৰাইজে স্বেচ্ছাই সহযোগিতা কৰিবলৈ আগবাঢ়ি আহে ৷
ইয়াৰোপৰি সমাজ কৰ্মীগৰাকীয়ে পৰিষদৰ মুখ্য কাৰ্যবাহী সদস্য তুলিৰাম ৰংহাঙে জিলাখনলৈ উন্নয়ণৰ জৰিয়তে কৰা পৰিৱৰ্তনৰ প্ৰশংসা কৰাৰ লগতে মুখ কাৰ্যবাহী সদস্য গৰাকীক উক্ত পথছোৱাৰ বাবে বিহীত ব্যৱস্থা লোৱাৰ বাবে অনুৰোধ জনায় ৷
