ASSAM TIMES POST
ডিফুঃ কাৰ্বি আংলং জিলা মহিলা সমিতিৰ প্ৰাক্তন সভানেত্ৰী আৰু প্রাক্তন সাধাৰণ সম্পাদক, বিশিষ্টা সমাজ সেৱিকা তৰুলতা বৰুৱাৰ ৮৫ বছৰ বয়সত বাৰ্ধক্য জনিত ৰোগত কালি ৰাতি প্রায় ১১.৩০ বজাত পৰলোক প্রাপ্তি হয়। এগৰাকী আদৰ্শ পত্নী, বোৱাৰী, মাতৃ আৰু পিছপৰা কাৰ্বি আংলং জিলাখনৰ মহিলা সমাজক আগুৱাই নিয়াৰ ক্ষেত্ৰত অন্যতম গুৰি ধৰোতা তৰুলতা বৰুৱাৰ মৃত্যুত ডিফুৰ লগতে সমগ্ৰ পাহাৰীয়া জিলাখনতে শোকৰ ছাঁ পৰিছে।
নগাঁও খৃষ্টিয়ানপত্তিৰ পিতৃ সদানন্দ বৰুৱাৰ ঔৰষত আৰু মাতৃ সেন্দুৰী বৰুৱাৰ গর্ভত ১৯৩৫ চনত জন্ম গ্ৰহণ কৰা তৰুলতা বৰুৱাৰ নগাঁওৰে গমাৰি আটিৰ নিৱাসী তথা কাৰবি আংলং জিলাৰ আবকাৰী বিভাগৰ অধীক্ষক ৰত্নেশ্বৰ ৰংপিৰ সৈতে ১৯৫১ চনত বিবাহ পাশত আৱদ্ধ হৈছিল।
তেতিয়াৰ নৱগঠিত পাহাৰীয়া জিলাখনৰ প্ৰতিষ্ঠা লগ্নৰ পৰাই স্বামী ৰত্নেশ্বৰ ৰংপিৰ সৈতে ডিফুত স্থায়ীভাৱে থাকিবলৈ লোৱা তৰুলতা বৰুৱাই কাৰ্বি আংলং জিলা মহিলা সমিতিৰ প্ৰতিষ্ঠাৰ সৈতে ওতঃপ্ৰোত ভাৱে জড়িত হয় আৰু পাছৰ পৰ্যায়ত ইয়াৰ সাধাৰণ সম্পাদক আৰু সভানেত্ৰী পদতো অধিস্থিত হৈছিল।
দুগৰাকী সুযোগ্যা জীয়াৰী আৰু দুটাকৈ সুযোগ্য পুত্ৰ সন্তানৰ আদর্শ মাতৃ তৰুলতা বৰুৱাই কাৰবি আংলং জিলা মহিলা সমিতিৰ জৰিয়তে পিছপৰা জিলাখনৰ মহিলা সমাজক আগুৱাই নিয়াৰ ক্ষেত্ৰত গুৰুত্বপূৰ্ণ ভূমিকা পালন কৰি থৈ যায়। তৰুলতা বৰুৱাৰ মৃত্যুত কাৰবি আংলঙে এগৰাকী বিদুষী মহিলা, নিষ্ঠাৱান সমাজ সেৱিকা হেৰুৱালে।
