ASSAM TIMES POST
ডিফুঃ পাহাৰীয়া জিলা সদৰ চহৰ ডিফুত সোমবাৰে নিশা এক দ্ৰুতবেগী বাহনে মহটিয়াই এজন নিৰিহ শ্ৰমিকৰ প্ৰাণ লোৱাৰ লগতে আন চাৰিজনক আহত কৰা ঘটনাই সদৰ চহৰ খনত চাঞ্চল্যৰ সৃষ্টি কৰিছে ৷
প্ৰাপ্ত খবৰ অনুসৰি শ্ৰমিক কেইজন ডিফুৰ পাৰ্শৱৰ্তী এলেকা বিৰলা আৰু ৮ কিল’ হাফজানৰ পথৰ পৰা সোমবাৰে নিশা কামৰ সন্ধানত বহিঃৰাজ্যলৈ ৰেলযোগে যাবলৈ পদপথে ডিফু ৰেল’ ষ্টেচনলৈ গৈ আছিল ৷
শ্ৰমিক কেইজন খোজ কাঢ়ি ডিফু ৰংখেলান বজাৰৰ মাজেৰে আহি থকাৰ সময়ত নিশা প্ৰায় ১১.৩০ মান বজাত পিছফালৰ পৰা আহি থকা তীব্ৰবেগী অজ্ঞাত বাহন এখনে অসাৱধান বশতঃ চাৰিজন শ্ৰমিকক মহটিয়াই ঘটনাস্থলীৰ পলায়ন কৰে৷
আৰক্ষী আৰু স্থানীয় লোকৰ সহায়ত আহত চাৰিজন শ্ৰমিকক ডিফু অসামৰিক চিকিৎসালয়লৈ নিয়া হয় যদিও ৱাইচিং ক্ৰ’ৰ পুত্ৰ হমচিং ক্ৰ’ (২৩) নামৰ শ্ৰমিকজনক চিকিৎসকে মৃত বুলি ঘোষণা কৰে৷
মৃত হমচিঙ ক্ৰ’ৰ ঘৰ ডিফুৰ হাফজান পথৰ ৮ কিল’ৰ ৰংচিঙদনত বুলি জানিব পৰা গৈছে ৷ আহত হোৱা আন তিনিজন শ্ৰমিক ক্ৰমে ডিফু হাফজান পথৰ ৮ কিল’ৰ ৰংচিংদনৰ ছিং কিলিঙৰ পুত্ৰ কামাৰ কিলিঙ (২৩) আৰু ডিফু বিৰলা গে’টৰ ক্ৰমে, গামবুৰা তেৰাঙৰ পুত্ৰ ৰতন টেৰাঙ (১৮) আৰু ছাৰ্থে ক্ৰ’ৰ পুত্ৰ বিদ্যা চিং ক্ৰ’ বুলি জানিব পৰা গৈছে ৷
দূৰ্ঘটনা সংঘটিত কৰা গাড়ীখন আৰু চালকৰ আৰক্ষীয়ে এতিয়াও কোনো সন্ধান লাভ কৰা নাই যদিও এই সন্দৰ্ভত তদন্ত অব্যাহত আছে বুলি আৰক্ষীৰ পৰা জানিব পৰা গৈছে ৷
www.assamtimes post.com
fb.com/assamtimespost2019
