নগাঁও : “কোভিড মহামাৰীৰ ফলত ২০ শতাংশ লোকে তেওঁলোকৰ কৰ্ম সংস্থাপন হেৰুৱাব লগা হোৱাৰ লগতে বিভিন্ন ক্ষেত্রত কৰ্মৰত ২০ৰ পৰা ৩০ শতাংশ লোকে পূৰ্বৰ কৰ্ম ত্যাগ কৰি অন্য কামত নিয়োজিত হ’বলগা হৈছে । কিছু সংখ্যক লোকে গেলামালৰ দোকান, শাক-পাচলিৰ দোকান, ফলমূলৰ দোকান, সৰু সুৰা ব্যৱসায়, ঘৰুৱা যোগান কৰ্ম আদিত নিয়োজিত হৈ জীৱিকা-নিৰ্বাহ কৰিব লগা হৈছে ।”
নগাঁও মহাবিদ্যালয়ৰ আভ্যন্তৰীণ মানদণ্ড আশ্বাসন কোষ আৰু এন. এছ. এছ গোটৰ যৌথ উদ্যোগত ‘স্বাস্থ্য, ক্ষুদ্র উদ্যোগ, আৰ্থ-সামাজিক, ডিজিটেল মাধ্যম, অনলাইন বজাৰ, ব্যৱসায় আৰু বিত্তীয় লেনদেন’ শীৰ্ষক ধাৰাবাহিকভাৱে সম্পন্ন কৰা দ্বিতীয় লানি অধ্যয়নত এই তথ্য উন্মোচিত হয় । মহাবিদ্যালয়খনৰ অধ্যক্ষ ড: শৰৎ বৰকটকীৰ পৃষ্ঠপোষকতাত আৰু আভ্যন্তৰীণ মানদণ্ড আশ্বাসন কোষৰ সমন্বয়ক ড: ভুৱন চন্দ্র চুতীয়াৰ নেতৃত্বত মহাবিদ্যালয়খনৰ আটাইকেইটা বিভাগৰ কেইবাগৰাকীও অধ্যাপক, ছাত্ৰ-ছাত্ৰী আৰু এন. এছ. এছ গোটৰ এটি এশ জনীয়া দলে যোৱা ২০ জুনৰ পৰা ২০ জুলাই লৈ এক উচ্চস্তৰীয় সমিতিয়ে নিৰূপণ কৰি দিয়া অনলাইন প্ৰ-পত্ৰৰ যোগেদি সমগ্র অসমৰ ১৪খন জিলাৰ প্ৰায় ৩৫০০ লোকক সামৰি ৭০০ ঘৰ মানুহৰ জৰীপ সম্পন্ন কৰি বিজ্ঞানসন্মতভাৱে কৰা বিশ্লেষণত জনসাধাৰণৰ মাজত কোভিড সচেতনতা, সামাজিক, অৰ্থনৈতিক, কৰ্মস্থলী পৰিৱৰ্তন, নিয়োগ, ক্ষুদ্ৰ ব্যৱসায়, ক্ষুদ্র উদ্যোগে সন্মুখীন হোৱা সমস্যাৰাজি, অনলাইন বজাৰ, ব্যৱসায় আৰু বিত্তীয় লেনদেন, জীৱন আৰু জীৱিকাৰ কেতবোৰ গুৰুত্বপূৰ্ণ তথ্য উন্মোচিত হয়।
তথ্য অনুসৰি প্ৰায় ২০ শতাংশ জনসাধাৰণ এতিয়াও কোভিড অতিমাৰীৰ প্ৰতি উদাসীন। সেয়েহে হয়তো চহৰৰ পাৰ্শ্বৱৰ্তী অঞ্চল আৰু গ্ৰামাঞ্চলৰ বহু অঞ্চলত বিভিন্ন ধৰণৰ খেল, জুৱা খেল আদিৰ যোগেদি হোৱা জন সমাগমে সচেতন মহলক বাৰুকৈয়ে চিন্তিত কৰে। তথ্য মতে ২২ শতাংশ জনসাধাৰণ এতিয়াও কোভিড পৰীক্ষণ কেন্দ্রৰ প্ৰতি অৱগত নহয়। যাৰ ফলত হয়তো নিৰ্দিষ্ট সময়ত পৰীক্ষা নোহোৱাৰ বাবে কোভিডৰ দ্বিতীয় ঢৌত সংক্ৰমণ আৰু মৃত্যুৰ সংখ্যাও বৃদ্ধি পায়।
উল্লেখ্য যে ২৯.৫ শতাংশ চহৰাঞ্চল আৰু ৭০.৫ শতাংশ গ্ৰামাঞ্চলৰ প্ৰায় ৪৭ শতাংশ পুৰুষ আৰু ৫৩ শতাংশ মহিলাই এই জৰীপ কাৰ্যত সহযোগিতাৰে নিজৰ মত আগবঢায়। আনহাতে উন্মোচিত তথ্য অনুসৰি কোভিড মহামাৰীয়ে ক্ষুদ্র ব্যৱসায়ী আৰু ক্ষুদ্ৰ উদ্যোগীলৈ বাৰুকৈয়ে ভাবুকি কঢ়িয়াই আনে। ৪০শতাংশ ক্ষুদ্র ব্যৱসায়ীয়ে নিজৰ ব্যৱসায় এৰিব লগা হয় আৰু ১৪ শতাংশ লোকে তেওঁলোকৰ অঞ্চলত ক্ষুদ্র উদ্যোগ বন্ধ হোৱাৰ ফলত তাত নিয়োজিত কৰ্মচাৰীসকল অন্য কৰ্মত নিয়োজিত হ’বলগা হৈছে।
ইপিনে ৬৩ শতাংশ গ্ৰামাঞ্চলৰ জনসাধাৰণে ইন্টাৰনেৰ দুৰ্বল, নেটৱৰ্কৰ বাবে বিভিন্ন অনলাইন কাম-কাজত সমস্যাৰ সন্মুখীন হ’বলগা হৈছে। ঠিক একেদৰে ৫৯.৩ শতাংশ চহৰাঞ্চলৰ জনসাধাৰণ কোভিড মহীমাৰীৰ পৰিপ্ৰেক্ষিতত তেওঁলোকৰ দৈনন্দিন বিত্তীয় লেন-দেন অনলাইনযোগে প্ৰকাশ কৰিবলৈ আগ্রহী বুলি মন্তব্য কৰে।
এই অধ্যয়নৰ দ্বাৰা নগাঁও মহাবিদ্যালয়ে অসমৰ চহৰ আৰু গ্ৰামাঞ্চলৰ জনসাধাৰণৰ মাজত সচেতনতা সৃষ্টিৰ বাবে ধাৰাবাহিকভাৱ অভিযান চলাই আহিছে । ইয়াৰ উপৰি নগাঁও কলেজৰ এন. এছ. এছ গোটৰ দ্বাৰা গ্ৰামাঞ্চলত আৰু কোভিড যুদ্ধৰ লগত জড়িত সুৰক্ষা কৰ্মীৰ মাজত হেণ্ড চেনিটাইজাৰ আৰু মাক্স বিতৰণ আৰু সজাগতা অভিযান কৰি আহিছে বুলি এন. এছ.এছৰ সহকাৰী প্ৰগেম অফিচাৰ মানস জ্যোতি নিৰ্মলীয়াই জানিবলৈ দিয়ে ।
