ষ্টাফ ৰিপ’ৰ্টাৰ
ডিফু : কাৰ্বি আংলং জিলাৰ বোকাজান থানাৰ আৰক্ষীয়ে আজি দুপৰীয়াৰ ভাগত অভিযান চলাই নিষিদ্ধ হেৰ’ইন আৰু নগদ ধনসহ এজন যুৱকক গ্ৰেপ্তাৰ কৰিবলৈ সক্ষম হৈছে। আৰক্ষী সূত্ৰে লাভ কৰা তথ্য অনুসৰি, এক গোপন সূত্ৰৰ পম খেদি আজি দিনৰ প্ৰায় ১২.৩০ বজাত বোকাজান থানাৰ ভাৰপ্ৰাপ্ত বিষয়া মণি চমুৱা, উপ-পৰিদৰ্শক হাওকাম চাংচন, সহকাৰী উপ-পৰিদৰ্শক ৰাজীৱ আহমেদৰ নেতৃত্বত আৰক্ষীৰ এটা দলে বোকাজান থানাৰ অন্তৰ্গত ইকৰাণীৰ মিথিলেশ গুপ্তা নামৰ যুৱকজনৰ ঘৰত তালাচী চলায়।
উক্ত তালাচীৰ সময়ত অভিযানকাৰী আৰক্ষীৰ দলটোৱে দুটা চাবোনৰ বাকচত ভৰাই থোৱা অৱস্থাত ১৮ গ্ৰাম হেৰ’ইন জব্দ কৰিবলৈ সক্ষম হয়। জব্দ হোৱা হেৰ’ইনখিনি মিথিলেশ গুপ্তাৰ এএছ-০৯-এচি-৯৫৭৯ নম্বৰৰ অটোৰিক্সাখনৰ পিছফালে লুকুৱাই ৰখা হৈছিল বুলি জানিব পৰা গৈছে। অভিযানকাৰী আৰক্ষীৰ দলটোৱে লগতে যুৱকজনৰ বাসগৃহৰ পৰা নগদ ১,৭৮,০০০ টকাও উদ্ধাৰ কৰে। উল্লেখ্য যে আৰক্ষীয়ে ইতিমধ্যে মিথিলেশ গুপ্তাকো গ্ৰেপ্তাৰ কৰিছে।
