নিউজ ডেস্কঃ
ৰাস্তাত কোনো বাইক আৰোহীৰ মূৰ খালী দেখিলেই পিন্ধাই দিয়ে হেলমেট। বিহাৰৰ কৈমুৰ জিলাৰ ৰাঘবেন্দ্রই বিগত কেইবা বছৰ ধৰি এই কামটোৱেই কৰি আহিছে। কেৱল সেয়াই নহয়, নিজৰ ঘৰ-বাৰী, মাটি-সম্পত্তি, গহনা বন্ধকত ৰাখি বিগত ছয় বছৰ ধৰি ৰাজ্যই ৰাজ্যই পথে পথে ঘূৰি এই কামেই নির্বিকাৰে কৰি আহিছে ৰাঘবেন্দ্রই।
ইতিমধ্যে ৪০ হাজাৰ বাইক আৰোহীৰ মূৰ সুৰক্ষিত হৈছে তেওঁ দিয়া হেলমেটে। কেৱল বিহাৰ নহয়, দিল্লী, উত্তৰ প্রদেশ, ঝাড়খণ্ড আৰু ৰাজস্থানলৈ গৈও হেলমেট বিলি কৰিছে ৰাঘবেন্দ্রই। এই সকলোবোৰেই আকৌ কৰিছে তেওঁ বিনামূল্যে। যাৰ বাবে এতিয়া তেওঁ সকলোৰে ওচৰত ‘হেলমেট মেন’ নামেৰে পৰিচিত।
বিনামূলীয়া হেলমেটৰ বিনিময়ত অৱশ্যে ৰাঘবেন্দ্রই এটা বস্তু বিচাৰি অনুৰোধ কৰে, তাকো জীবন গঢ়াৰ কামত ব্যৱহাৰ কৰিবৰ বাবে। সেয়া হৈছে ষষ্ঠ শ্ৰেণীৰ পৰা স্নাতক স্তৰলৈ কিতাপ বিচাৰে ৰাঘবেন্দ্রই। ইয়াৰ আঁৰতো কাৰণ আছে। ৰাঘবেন্দ্রই এই কিতাপবোৰ দুখীয়া ল’ৰা-ছোৱালীৰ মাজত বিলাই দিয়ে। ইতিমধ্যে এনেদৰে কেইবা লাখ কিতাপ বিলাইছে তেওঁ।
কিন্তু হঠাৎ এনেদৰে হেলমেট বিলোৱাৰ আঁৰৰ ৰহস্য কি? ইয়াৰ আঁৰত আছে এটি ঘটনা। ৰাঘবেন্দ্রই জনোৱা মতে, ২০১০ত তেওঁৰ কলেজৰ এজন বন্ধুৰ বাইক দুর্ঘটনাত মৃত্যু হৈছিল। বন্ধুজনে হেলমেট অবিহনে বাইক চলাইছিল। হেলমেট নথকাৰ কাৰণেই মূৰত আঘাত লাগি মৃত্যু হৈছিল তেওঁৰ। উক্ত ঘটনাই ৰাঘবেন্দ্রৰ চিন্তাধাৰাত এক মুহূৰ্ততে পৰিবৰ্তন আনি দিছিল। তাৰ পিছতেই তেওঁ হেলেমেট সন্দৰ্ভত সচেতনতামূলক প্রচাৰ আৰম্ভ কৰে। তাৰ পিছত তেওঁ টকা-পইচা যোগাৰ কৰি হেলমেট কিনে। হেলমেটবিহীন বাইক আৰোহী দেখিলেই তেওঁলোকৰ মূৰত হেলমেট পিন্ধাই দিছিল। ক্রমে হেলমেট বিতৰণৰ সংখ্যা বাঢ়ি থাকে। পিছত এনেকুৱা এটা সময় যে হেলমেট কিনাৰ বাবে ৰাঘবেন্দ্ৰই নিজৰ ঘৰ, গহনা, মাটি পর্যন্ত বন্ধকত ৰাখিব লগা হয়। তেওঁৰ এই কামৰ প্রশংসা কৰিছে খোদ কেন্দ্রীয় পৰিবহণমন্ত্রী নিতিন গাডকাৰীয়েও।
