ষ্টাফ ৰিপ’ৰ্টাৰ
ডিফু : যোৱা ৪ ছেপ্তেম্বৰত কাৰবি আংলঙৰ ছয়টাকৈ প্ৰাক্তন উগ্ৰপন্থী সংগঠনৰ সৈতে কেন্দ্ৰীয় আৰু ৰাজ্য চৰকাৰৰ শান্তি চুক্তি স্বাক্ষৰিত হোৱাৰ পিছত কেন্দ্ৰীয় চৰকাৰে এমাহৰ ভিতৰত সংগঠনসমূহ ভংগ কৰাৰ নিৰ্দেশ প্ৰদান কৰাৰ পিছত দেওবাৰে কেপিএলটিয়ে আনুষ্ঠানিকভাৱে ভংগ ঘোষণা কৰিছে৷ সংগঠনটোৰ বকলীয়াঘাট আৰু কলঙাৰ শিৱিৰত পতাকা সম্বৰণ কৰি সংগঠনটো ভংগ হোৱাৰ আনুষ্ঠানিকতা সম্পন্ন কৰে ৷
ইয়াৰ পূৰ্বে পূব কাৰবি আংলং জিলাৰ KPLTৰ বকলীয়াঘাট শিৱিৰৰ সাধাৰণ সম্পাদক ৱজাৰু হানজাং আৰু সহকাৰী সাধাৰণ সম্পাদক এছ ক্ৰনিহাঙে সংবাদমেল সম্বোধন কৰি সংগঠনটো আনুষ্ঠানিকভাবে ভংগ হোৱা ঘোষণা কৰে ৷ অনাগত সময়ত জিলাবাসীৰ মূলদাবী ২৪৪(ক) সন্দৰ্ভত আলাপ-আলোচনাৰ মাধ্যমেৰে আগবঢ়া হ’ব বুলি মন্তব্য কৰে নেতাদ্বয়ে ৷
প্ৰসংগক্ৰমে উল্লেখযোগ্য যে KPLT-ৰ মুঠ কেডাৰৰ সংখ্যা ২৮২ ৷ ২০১৬ চনত অস্ত্ৰ বিৰত ঘোষণা কৰি চৰকাৰৰ সৈতে শান্তি প্ৰক্ৰিয়া অব্যাহত ৰখা সংগঠনটোৰ হৈ বিগত সময়ছোৱাত ৭৩ গৰাকী নেতা/কেডাৰে প্ৰাণ হেৰুৱাবলগীয়া হোৱা বুলি সংগঠনটোৰটোৰ নেতাগৰাকীয়ে জানিবলৈ দিয়ে ৷
