ষ্টাফ ৰিপ’ৰ্টাৰ
ডিফু : কাৰবি আংলং জিলাৰ সদৰ চহৰ ডিফুত গাহৰি মাংস বিক্ৰী নিষিদ্ধ কৰণকলৈ বিক্ৰেতাসকলৰ মাজত হাহাকাৰ সৃষ্টি হৈছে ৷ যোৱা ২৬ আগষ্টত ডিফুৰ পেছনেট মাল্টি ফাৰ্মত গাহৰিৰ দেহত আফ্ৰিকান শ্বোৱাইৰ ফ্লুৰ অৱস্থিত ধৰা পৰা পিছত সংশ্লিষ্ট বিভাগৰ বিশেষজ্ঞৰ উপস্থিতিত ফাৰ্মখনৰ ৪০০টা গাহৰি নিধন কৰি হৈছিল সবিস্তাৰে বাতৰি প্ৰকাশ পাইছিল৷ আজি ডিফু দৈনিক বজাৰৰ গাহৰি মাংস বিক্ৰী কৰা একাংশ খুছুৰা ব্যৱসায়ী লগতে গাহৰি পালকে একত্ৰিত হৈ গাহৰি বিক্ৰী নিষিদ্ধকৰণৰ পিছত সন্মুখীন হোৱা সমস্যা সন্দৰ্ভত সাংবাদিকৰ সৈতে বাৰ্তালাপ কৰে ৷
তেওঁলোকে ক্ষোভ উজাৰি কয় যে, প্ৰায় তিনি সপ্তাহমান পূৰ্বে ডিফুত গাহৰিৰ দেহত আফ্ৰিকান ছোৱাইন ফ্লুৰ অৱস্থিতি ধৰা পৰাৰ পিছত স্থানীয় প্ৰশাসনে গাহৰি আৰু ইয়াৰ মাংস বিক্ৰেতাসকলক উদ্দেশ্যি গাহৰিৰ মাংস বিক্ৰি কৰিবলৈ নিষেধ কৰে ৷ এইলৈ স্থানীয় প্ৰশাসন বা ডিফু পৌৰ নিগমে কোনো লিখিত জাননী বিক্ৰেতাসকলক দিয়া নাছিল যদিও উক্ত মৌখিক নিৰ্দেশনাকে মানি উক্ত লোকসকলে গাহৰি মাংস বিক্ৰী বন্ধ ৰাখিছে ৷
আনহাতে একমাত্ৰ গাহৰি পালন বা মাংস বিক্ৰিৰ ওপৰতে নিৰ্ভৰশীল এইসকল লোকে গাহৰি ও ইয়াৰ মাংস বিক্ৰী বন্ধৰ ফলত সন্তানৰ এডমিছনৰ পৰা আৰম্ভ কৰি জীৱিকা নিৰ্বাহৰ ক্ষেত্ৰত চৰম আৰ্থিক অনাটনত ভুগিছে ৷ ফলত নানা সমস্যাৰ সন্মূখীন হৈছে বুলি আক্ষেপ কৰিছে ৷ আনহাতে গাহৰি ও ইয়াৰ মাংস বিক্ৰিৰ ওপৰত প্ৰতিবন্ধকতা কেতিয়া আঁতৰিব তাৰ ওপৰতো স্থানীয় প্ৰশাসনৰ পৰা কোনো জাননী নোপোৱাকলৈও চৰম অনিশ্চয়তাত ভুগিছে গাহৰিৰ মাংস বিক্ৰেতাসকলে ৷ অচিৰেই স্থানীয় প্ৰশাসনে তেওঁলোকৰ সমস্যা সমাধান কৰিব বুলি বিক্ৰেতা সকল আশাবাদী বুলি সংবাদ মাধ্যমৰ জৰিয়তে স্থানীয় প্ৰশাসনক অনুৰোধ জনাইছে ৷
