ষ্টাফ ৰিপ’ৰ্টাৰ
ডিফু : অসম আৰু গুজৰাটৰ মাজত সংস্কৃতিৰ বিনিময়ৰ উদ্দেশ্যে আজিৰে পৰা বোকাজান নগৰৰ চাৰি নং ৱার্ডত থকা বোকাজান ক্রীড়া সন্থাৰ খেলপথাৰত আজিৰে পৰা এক বিশেষ অনুষ্ঠানৰ আয়োজন কৰা হৈছে।
আজি পুৱা বোকাজান নগৰত থকা জনস্বাস্থ্য কাৰিকৰী বিভাগৰ পৰিদর্শন বাংলোত বোকাজানৰ বিধায়ক তথা অসম বিধানসভাৰ উপাধ্যক্ষ ডাঃ নোমল মমিনে এক সংবাদমেলৰ আয়োজন কৰি এই কথা প্রকাশ কৰে। উপাধ্যক্ষগৰাকীয়ে সংবাদমেলত উল্লেখ কৰা অনুসৰি, এই অনুষ্ঠানৰ জৰিয়তে অসমৰ বিহু নৃত্যকে ধৰি কাৰ্বি, বড়ো, আদিবাসী, গাৰো আদি সকলো জাতি জনগোষ্ঠীৰে লোক-সংস্কৃতিসমূহ প্রদর্শন কৰাৰ ব্যৱস্থা কৰা হ’ব। ঠিক সেইদৰে গুজৰাটৰ পৰা আহি ইতিমধ্যে অসমত উপস্থিত হোৱা কুৰিজনীয়া শিল্পীৰ দলটোৱে গুজৰাটৰ লোক-সংস্কৃতিৰ বিভিন্ন অনুষ্ঠান পৰিবেশন কৰিব বুলি জানিব পৰা গৈছে।
আনহাতে, বহিঃৰাজ্যৰ শিল্পীৰ দলে উক্ত অনুষ্ঠানত বিহুনৃত্য প্রদর্শন কৰাৰ লগতে গুজৰাটৰ পৰা অহা শিল্পীৰ দলটোৱে অসমৰ শিল্পীসকলে ব্যবহাৰ কৰিব পৰাকৈ ‘দাণ্ডিয়া নৃত্যৰ যথেষ্টখিনি সঁজুলি লগত লৈ অহা বুলি জানিবলৈ দিয়ে। এই সাংস্কৃতিক বিনিময় অনুষ্ঠানত কাইলৈ ভাৰত চৰকাৰৰ যোগাযোগ দপ্তৰৰ ৰাজ্যমন্ত্রী দেবুছিং জেছিংভাই চৌহান মুখ্য অতিথি হিচাপে উপস্থিত থাকিব। অনুষ্ঠানটোত কাইলৈ গুজৰাটৰ সাংসদ দীপছিং শংকবছিং ৰাথোড় বিশিষ্ট অতিথি হিচাপে উপস্থিত থাকিব।
