নিউজ ডেস্কঃ
ডাৱৰ বিস্ফোৰণৰ ফলত হোৱা ধাৰাসাৰ বৰষুণত তীব্ৰ ধল আৰু খহনীয়াৰ কবলত পৰিছে উত্তৰাখণ্ডৰ নাইনিতাল জিলাৰ ৰামগড়ৰ এখন গাওঁ। খহনীয়াৰ তলত বহুকেইজন লোক আবদ্ধ হৈ থকাৰ আশঙ্কা কৰিছে জিলা প্রশাসনে। নাইনিতালৰ বিশেষ আৰক্ষী অধীক্ষক প্রিয়দর্শিনীয়ে জনোৱা মতে, বহুকেইজনক আহত অৱস্থাত উদ্ধাৰ কৰা হৈছে। আৰু কোনোবা আবদ্ধ হৈ আছে নেকি সেয়া উদ্ধাৰকাৰী দলে বিচাৰি আছে।
বতৰ বিজ্ঞান কেন্দ্ৰৰ পূর্বাভাস মতেই বিগত দুদিন ধৰি উত্তৰাখণ্ডৰ নাইনিতালসহ বহুকেইখন জিলাত ধাৰাসাৰ বৰষুণ হৈছে। ৰাস্তা-ঘাট আনকি ঘৰো পানীৰ তলত। যাৰ বাবে জনজীৱন বিপর্যস্ত হৈ পৰিছে। সোমবাৰে প্রবল বৰষুণত তিনিজনৰ মৃত্যু হৈছে। দুর্যোগপূর্ণ বতৰৰ বাবে চাৰধাম যাত্রাত তীৰ্থযাত্ৰীসকলক সম্প্ৰতি নিষেধ কৰা হৈছে।
সমগ্ৰ পৰিস্থিতি সন্দৰ্ভত উত্তৰাখণ্ডৰ মুখ্যমন্ত্রী পুষ্কৰ সিং ধামিৰ সৈতে কথা পাতিছে প্রধানমন্ত্রী নৰেন্দ্র মোদীয়ে।
