নিউজ ডেস্কঃ
চলিত বছৰত দেশত সৰ্বাধিক আত্মহত্যাৰ ঘটনা ঘটিছে মহাৰাষ্ট্রত। আত্মহত্যা সন্দৰ্ভত বৃহস্পতিবাৰে নেচনেল ক্রাইম ৰেকর্ড ব্যুৰোই যি তথ্য প্রকাশ কৰিছে, তাত বিগত ১০ মাহত দেশত ১,৫৩,০৫২ জনে আত্মহত্যা কৰিছে। যিটো বিগত বছৰৰ তুলনাত প্রায় ১০ শতাংশ বেছি। আত্মহত্যাৰ মুঠ ঘটনাত শীর্ষত আছে মহাৰাষ্ট্র(১৯,৯০৯)।
আত্মহত্যাৰ মূল কাৰণবোৰ বিশ্লেষণ কৰি দেখা গৈছে যে পাৰিবাৰিক বিবাদৰ কাৰণে ৩৩.৬ শতাংশই নিজৰ জীৱন বিসৰ্জন দিছে। ১৮ শতাংশই শাৰীৰিক অসুস্থতা সহ্য কৰিব নোৱাৰি আত্মহত্যাৰ পথ বাছি লৈছে। তেনেদৰে বিয়া আৰু প্রেমজনিত কাৰণত আত্মহত্যা কৰিছে যথাক্রমে ৫ আৰু ৪.৪ শতাংশ ব্যক্তিয়ে। পৰীক্ষাত ব্যর্থ হোৱাৰ কাৰণে আত্মহত্যাৰ পথ বাছি লৈছে ১.৪ শতাংশ শীক্ষাৰ্থীয়ে।
জীৱিকাৰ ফালৰ পৰা চালে দেশত সৰ্বাধিক আত্মহত্যা কৰিছে দিনমজদুৰে (২৪.৬ শতাংশ)। আনহাতে, মানসিক অৱসাদত ভুগি আত্মহত্যাৰ তালিকাত দ্বিতীয় স্থানত আছে বোৱাৰী (১৪.৬শতাংশ)। পৰিসংখ্যা মতে, আত্মহত্যা কৰাসকলৰ ভিতৰত অবিবাহিত পুৰুষৰ সংখ্যা সর্বাধিক। চলিত বছৰত প্রায় ২৫ হাজাৰ অবিবাহিত ব্যক্তিয়ে আত্মহত্যা কৰিছে। তাৰ তুলনাত অবিবাহিত মহিলাৰ আত্মহত্যাৰ সংখ্যা ১১ হাজাৰৰ ওচৰত। পুৰুষসকলৰ ভিতৰত ১৮-৩০ আৰু ৩০-৪৫ বছৰৰ ভিতৰত আত্মহত্যাৰ প্রৱণতা প্রায় সমান।
এই দুটা বয়সৰ ভিতৰত আত্মহত্যা কৰিছে যথাক্রমে ৩৪,৬২৯ আৰু ৩৬,৫২৫ জনে। উল্লেখ্য, ১৮-৩০ বছৰৰ মহিলাসকলে চলিত বছৰত সৰ্বাধিক ১৮,০৭৩গৰাকীয়ে আত্মহত্যা কৰিছে। সমীক্ষাটোত লগতে দেখুওৱা হৈছে যে মাধ্যমিক স্তৰৰ শিক্ষাৰ্থীসকলৰ ক্ষেত্রত আত্মহত্যাৰ প্রবণতা সকলোতকৈ বেছি (২৩.৪ শতাংশ)। এমবিএৰ দৰে প্রফেচনেল পাঠ্যক্ৰম কৰাসকলৰ ক্ষেত্রত আত্মহত্যাৰ হাৰ সকলোতকৈ কম, মাত্র ০.৩ শতাংশ।
