নিউজ ডেস্কঃ
কৃষকৰ আন্দোলন চলি থকা সময়ত কৃষকসকলক উদ্দেশ্যি নেতিবাচক মন্তব্য কৰিছিল কঙ্গনা ৰানাৱতে। কেন্দ্রই কৃষি আইন প্রত্যাহাৰ কৰা সন্দৰ্ভতো বিতর্কিত মন্তব্য কৰে অভিনেত্রীগৰাকীয়ে। তাৰ পৰিণাম ভুগিবলগা হৈছে এতিয়া কংগনাই৷ পঞ্জাবৰ চণ্ডীগড়-উনা এক্সপ্রেছৱেত কৃষকৰ বিক্ষোভৰ সন্মুখীন হ’বলগা হয় অভিনেত্ৰীগৰাকী। শুক্রবাৰে এই ঘটনা ঘটে কিৰতপুৰ সাহিবৰ বুঙ্গা সাহিব এলেকাত। ছবিত দেখা গৈছে কঙ্গনাৰ গাড়ী ঘেৰাও কৰি বিক্ষোভ প্ৰদৰ্শন কৰিছে বহু কৃষকে। দিছে ‘কংগনা মুর্দাবাদ’ ধ্বনি। পৰিস্থিতি চম্ভালিবলগা হৈছে আৰক্ষীয়ে। পাঞ্জাবৰ কৃষকসকলক খলিস্তানীৰ সৈতে তুলনা কৰাত তীব্র অসন্তুষ্টিৰ সৃষ্টি হয় শিখ সম্প্রদায়ৰ কৃষকসকলৰ মাজত। শুক্ৰবাৰে উক্ত মন্তব্যৰ বাবে ক্ষমা বিচৰাৰ পিছতহে কঙ্গনাৰ গাড়ী যাবলৈ দিয়ে তেওঁলোকে৷
আনহাতে, কঙ্গনাৰ মন্তব্য, ‘আৰক্ষী নাথাকিলে মই গণপ্ৰহাৰৰ চিকাৰ হ’লোহেঁতেন। এইসকল লোকৰ লাজলগা উচিত।’ এই ঘটনাৰ এটি ভিডিও ক্লিপ প্রকাশ কৰি অভিনেত্রীগৰাকীয়ে কয়, ‘পঞ্জাবত প্ৰৱেশৰ পিছত এদল মানুহে আমাৰ গাড়ী আক্রমণ কৰে। তেওঁলোকে কৈছে তেওঁলোক হেনো কৃষক। এফালে নিজকে কৃষক বুলিছে, আনফালে মোক আক্রমণ কৰিছে৷ অশ্ৰাব্য গালি দিছে, প্রাণে মৰাৰ ভাবুকি দিছে। এই দেশত এনেদৰে প্রকাশ্যে গণ আক্ৰমণ চলিছে।’
