ASSAM TIMES POST
ডিফুঃ কাৰ্বি আংলং স্বায়ত্ত্ব শাসিত পৰিষদৰ চাৰিগৰাকী মনোনীত সদস্যৰ আজি শপত গ্ৰহণ অনুষ্ঠিত হৈ যায়। ডিফুৰ আৰবৰেটাম কাম ক্ৰাফট চেন্টাৰত আজি দিনৰ ১১ বজাত অনুষ্ঠিত হোৱা এক আড়ম্বৰপূৰ্ণ অনুষ্ঠানত জিলা উপায়ুক্তই চাৰিওগৰাকী সদস্য ক্ৰমে সীমা ৰংহাংপী, অজিত কুমাৰ দে’, হাপুৰাম কিস্কু আৰু চন্দ্ৰ বাহাদুৰ ছেত্ৰীক পদ আৰু গোপনীয়তাৰ শপতবাক্য পাঠ কৰোৱায়।
শপত গ্ৰহণ অনুষ্ঠানত কাৰ্বি আংলং স্বায়ত্ত্বশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাং, অসম চৰকাৰৰ পাৰ্বত্য এলেকা উন্নয়ন মন্ত্ৰী চুম ৰংহাং, সাংসদ হৰেণ ছিং বে’, পৰিষদৰ উপাধ্যক্ষ ৰীতেশ ইংহি, পৰিষদৰ প্ৰধান সচিব, কেইবাগৰাকী কাৰ্যবাহী সদস্য উপস্থিত থাকে ।
আজি শপত গ্ৰহণ কাৰবি পৰিষদৰ মনোনিত সদস্য কেইগৰাকীয়ে বিজেপিৰ উৰ্ধতন মহল আৰু কাৰ্বি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙক আন্তৰিক কৃতজ্ঞতা জ্ঞাপন কৰাৰ লগতে নিজৰ দায়িত্ব সততা আৰু নিষ্ঠাৰে পালন কৰাৰ লগতে ৰাইজৰ অভাৱ- অভিযোগ সমূহ তেওঁলোকৰ কাৰ্যকালত পূৰণ কৰিবলৈ অহোৰুৰুষাৰ্থ কৰিব বুলি সাংবাদিকৰ আগত ব্যক্ত কৰে ৷
