নলবাৰীৰ প্ৰতিবেদক:
আৰ্যভট্ট বিজ্ঞান কেন্দ্ৰৰ টিহু খণ্ডৰ উদ্যোগত আৰু অসম বিজ্ঞান প্ৰযুক্তিবিদ্যা আৰু পৰিৱেশ পৰিষদৰ সহযোগত ২৭ জানুৱাৰিত টিহুৰ বিবেকানন্দ বিদ্যা নিকেতনত টিহু খণ্ডৰ অন্তৰ্গত বিদ্যালয়বোৰৰ শিক্ষাৰ্থীৰ মাজত বিজ্ঞান ভিত্তিক আৰ্হি, আকস্মিক বক্তৃতা আৰু প’ষ্টাৰ অংকন বিষয়ক প্ৰতিযোগিতা সম্পন্ন হয়।
এই উপলক্ষে পুৱাৰ ভাগত আৰ্যভট্ট বিজ্ঞান কেন্দ্ৰৰ পতাকা উত্তোলন কৰে আৰ্যভট্ট বিজ্ঞান কেন্দ্ৰৰ টিহু খণ্ডৰ সমন্বয়ক অণিমা কলিতা ডেকাই। গছপুলি ৰোপণ কৰে সমগ্ৰ শিক্ষাৰ বাক্সা জিলাৰ জিলা আঁচনি বিষয়া প্ৰণৱজ্যোতি কলিতাই। প্ৰতিযোগিতা উদ্বোধন কৰে ভাৰতী উচ্চ মাধ্যমিক বিদ্যালয়ৰ প্ৰধান শিক্ষক অজিত মেধিয়ে।
আৰ্যভট্ট বিজ্ঞান কেন্দ্ৰৰ নলবাৰী জিলাৰ সমন্বয়ক প্ৰদীপ মহন্তই এই প্ৰতিযোগিতাবোৰৰদ্বাৰা শিক্ষাৰ্থীসকলৰ হ’ব পৰা অভিজ্ঞতা, অৰ্হতা, জ্ঞান আৰু পাব পৰা সুবিধা সন্দৰ্ভত বিতং কয়। বিশিষ্ট শিক্ষাব্ৰতী হৰেন্দ্ৰনাথ শৰ্মা আৰু টিহু মহাবিদ্যালয়ৰ প্ৰাণী বিজ্ঞান বিভাগৰ বিভাগীয় মুৰব্বী অধ্যাপিকা ডঃ দীপালী দাস ডেকায়ো শিক্ষাৰ্থীসকলৰ উদ্দেশি ভাষণ প্ৰদান কৰে।
ইয়াৰ পাছত নলবাৰী জিলা সাহিত্য সভাৰ সম্পাদক পংকজ বেজবৰুৱাৰ সঞ্চালনাত হোৱা বঁটা বিতৰণী আৰু অভিনন্দন অনুষ্ঠানত টিহুৰ বিবেকানন্দ বিদ্যা নিকেতনৰ প্ৰতিষ্ঠাপক প্ৰমোদ ডেকা, সাংবাদিক অজিত কুমাৰ শৰ্মা, আৰ্যভট্ট বিজ্ঞান কেন্দ্ৰৰ টিহু খণ্ডৰ সমন্বয়ক অণিমা কলিতা ডেকা আৰু ভাস্কৰজ্যোতি কলিতাই প্ৰাসংগিক ভাষণ প্ৰদান কৰে।
এই অনুষ্ঠানত ২০২১ বৰ্ষৰ ৰাষ্ট্ৰীয় শিশু বিজ্ঞান সমাৰোহলৈ নলবাৰী জিলাৰপৰা বাছনি হোৱা টিহুৰ বিবেকানন্দ বিদ্যা নিকেতনৰ শিক্ষাৰ্থী জিষ্ণুপ্ৰিয়া কলিতা আৰু সঞ্জনা কাশ্যপক সাদৰ অভিনন্দন জ্ঞাপন কৰা হয়। উল্লেখযোগ্য যে বিজ্ঞানৰ আৰ্হি প্ৰতিযোগিতাত প্ৰথম টিহুৰ শংকৰদেৱ শিশু বিদ্যা নিকেতনৰ শিক্ষাৰ্থীদ্বয় ক্ৰমে দেৱৰ্ষি মেধি আৰু ধৃতিৰাজ চৌধুৰী, দ্বিতীয় টিহু ছোৱালী উচ্চ মাধ্যমিক বিদ্যালয়ৰ শিক্ষাৰ্থীদ্বয় ক্ৰমে হৰ্ষিতা শৰ্মা আৰু প্ৰিয়া দাস, তৃতীয় স্থান লাভ কৰে হাৰিভাঙা উচ্চতৰ মাধ্যমিক বিদ্যালয়ৰ শিক্ষাৰ্থী জুমন বৰ্মনে।
প’ষ্টাৰ অংকন প্ৰতিযোগিতাত প্ৰথম টিহুৰ শংকৰদেৱ শিশু বিদ্যা নিকেতনৰ শিক্ষাৰ্থী বিকিকেশ হালৈ, দ্বিতীয় টিহুৰ বিবেকানন্দ বিদ্যা নিকেতনৰ শিক্ষাৰ্থী মৌচম ডেকা আৰু তৃতীয় স্থান লাভ কৰে টিহু ছোৱালী উচ্চ মাধ্যমিক বিদ্যালয়ৰ শিক্ষাৰ্থী মধুস্মিতা ৰয়ে।
আকস্মিক বক্তৃতা প্ৰতিযোগিতাত প্ৰথম টিহুৰ বিবেকানন্দ বিদ্যা নিকেতনৰ শিক্ষাৰ্থী ৰাহুল পাঠক, দ্বিতীয় টিহুৰ শংকৰদেৱ শিশু বিদ্যা নিকেতনৰ শিক্ষাৰ্থী দেৱৰ্ষি মেধি আকৌ তৃতীয় স্থান টিহুৰ বিবেকানন্দ বিদ্যা নিকেতনৰ শিক্ষাৰ্থী ৰক্তিম ৰাজমেধিয়ে লাভ কৰে।
