নিউজ ডেস্কঃ
আমেৰিকাৰ দাবী, ৰাছিয়াই ইউক্ৰেইন আক্ৰণৰ প্ৰস্তুতি চলাইছে৷ সীমান্তত সাজু কৰিছে বিশাল সেনাবাহিনী, যুদ্ধ বিমানকে ধৰি অন্যান্য গাড়ী আৰু যুদ্ধৰ সা-সৰঞ্জাম৷ ইফালে মস্কোৰ তৰফৰ পৰা ইউক্রেইনৰ সৈতে যুদ্ধৰ সম্ভাৱনা নাকচ কৰা হৈছে। ৰুছ প্রতিৰক্ষা মন্ত্ৰালয়ৰ মুখপাত্র আইগৰ কোনাশেনকভে মঙলবাৰে জনাইছিল, দক্ষিণ আৰু পশ্চিম প্রদেশৰ সেনাবাহিনীৰ সংশ্লিষ্ট পেৰেড শেষ হোৱাত তেওঁলোক ঘাটিলৈ উভতি গৈছে। কিন্তু বৃহস্পতিবাৰে উপগ্রহ চিত্র দাঙি ধৰি আমেৰিকাই দাবী কৰে, ইউক্রেইন সীমান্তৰ পৰা সেনা আঁতৰোৱাতো দূৰৈৰ কথা, এতিয়াও ক্রমাগত সেনা পঠাই আছে মস্কোই। ইউক্রেইন সীমান্তৰ ৫০ কিলোমিটাৰৰ ভিতৰত অন্তত ১৪টা ঘাটি বনাইছে ৰুছ ফৌজে। দ্রুততাৰে সীমান্তলৈ সেনা পঠাবলৈ নিশাৰ ভিতৰতে নিৰ্মাণ কৰা হৈছে অস্থায়ী সেতু।
এই পৰিস্থিতিতে ক্রাইমিয়াৰ বন্দৰত কেইদিনমান পূৰ্বেই উপস্থিত হয় তিনিখন ৰুছ যুদ্ধজাহাজ। ২০১৪ৰ পৰা ৰাছিয়াই ইউক্রেইনৰ এই অংশটো নিজৰ দখলত ৰাখি থৈছে। তাত সক্রিয় ৰুছপন্থী বিদ্রোহীসকলৰ সৈতে ইতিমধ্যেই ইউক্রেইন সেনাৰ কেইবাটাও পৰ্যায়ত সংঘর্ষ হোৱা বুলি আমেৰিকাসহ পশ্চিমীয়া সংবাদ মাধ্যমবোৰৰ দাবী। আমেৰিকাৰ চোৰাংচোৱা বাহিনীর এক ৰিপোর্টত দাবী, এই মুহূর্তত ইউক্রেইন সীমান্তত অতিকমেও ১ লক্ষ ৯০ হাজাৰ সেনা মজুত কৰিছে ভ্লাডিমিৰ পুটিন চৰকাৰে।
এনে সম্ভাৱ্য যুদ্ধ পৰিস্থিতিত ইউক্রেইনত আবদ্ধ হৈ পৰা ভাৰতীয় বিশেষকৈ শিক্ষাৰ্থীসকলক উভতাই আনিবলৈ সক্রিয় হৈছে নতুন দিল্লী। শুকুৰবাৰে এয়াৰ ইণ্ডিয়াই জনাইছে, অহা ২২, ২৪ আৰু ২৬ ফেব্রুৱাৰীত ইউক্রেইনত আবদ্ধ ভাৰতীয়সকলক উভতাই আনিবলৈ বিশেষ বিমান চলোৱা হ’ব।
