নিউজ ডেস্কঃ
অভিনেতা হিচাবে বলিউডত ইতিমধ্যে অতিক্ৰম কৰিছে প্রায় ৩৭ বছৰ। ৬৭ সংখ্যক জন্মদিনত টুইটত অর্ধ নগ্ন হৈ তজবজীয়া স্বাস্থ্যৰ পৰিচয় দিলে অনুপম খেৰে।
কলেজত পঢ়াৰ সময়তে এটি অডিছনৰ বাবে অনুপম খেৰে মাত্র ১১৮ টকাৰ বাবে চুৰি কৰিছিল। এক সংবাদ মাধ্যমক তেওঁ জনাইছিল, ছিমলাত থকাৰ সময়ত পঞ্জাব বিশ্ববিদ্যালয়ত অনুষ্ঠিত উক্ত অডিছনত যোগ দিলে ২০০ টকা বৃত্তি পাব৷ কিন্তু তাৰ বাবে পিতৃ-মাতৃৰ পৰা টকা বিচৰাৰ সাহস তেওঁৰ নাছিল। সেয়ে তেওঁৰ মাতৃয়ে যিটো মন্দিৰত টকা জমা কৰিছিল বাধ্য হৈ তাৰ পৰাই টকা চুৰি কৰিছিল। পিছত বৃত্তি পালেও অনুপম খেৰে উক্ত চুৰিকাৰ্যৰ বাবে মাকৰ মাৰ খাবলগাও হৈছিল।
৮০ আৰু ৯০ৰ দশকৰ পৰা মূলত পিতৃৰ চৰিত্রত অভিনয় কৰিলেও উক্ত পৰিসৰৰ মাজতেই অভিনেতা হিচাবে নিজৰে অভিলেখ বাৰম্বাৰ ভংগ কৰিছে। তেওঁৰ অভিনীত খলনায়ক চৰিত্রবোৰৰ মাজতো মৌলিকতাৰ ছাপ আছিল। ‘কহো না প্যাৰ হ্যায়’, ‘দিল’ ছবি দুখন যাৰ ভিতৰত অন্যতম। অৱশ্যে যিমানে দিন গৈছে অনুপম খেৰৰ অভিনয় সত্তা আৰু চোকা হৈছে। কিন্তু অভিনয়ৰ লগতে শৰীৰ সম্পৰ্কেও অনুপম খেৰ কিমান যত্নশীল সেয়া ফটোৰ পৰাই স্পষ্ট। এই বয়সতো অনুপমৰ ‘ফিট বডি’ চাই আচৰিত হৈ গ’ল ঋত্বিক ৰোশন৷ ফটোৰ তলত তেওঁৰ মন্তব্য, ‘চমৎকাৰ, শুভ জন্মদিন।’
উল্লেখ্য, অহা ১১ মার্চত মুক্তি পাব কাশ্মীৰী পণ্ডিতসকলৰ ওপৰত নিৰ্মিত অনুপম খেৰ অভিনীত ছবি ‘দ্য কাশ্মীৰ ফাইলছ’।
