পেৰ’লত মুকলি হোৱাৰ পিছতেই হত্যাৰ ষড়যন্ত্ৰ ৰচিছিল যাৱজ্জীৱন কাৰাদণ্ডৰ শাস্তি ভুগি থকা আচামীয়ে। গোপন সূত্ৰৰ পৰা খবৰ পোৱাৰ পিছতে আৰক্ষীয়ে তেওঁ কৰায়ত্ত কৰে। কিন্তু আৰক্ষীৰ হাতৰ পৰা পলাবলৈ চেষ্টা কৰাৰ উপৰি আৰক্ষীৰ ওপৰত গুলীচালনাও কৰে। ফলত আৰক্ষীৰ গুলীচালনাত (firing of the Police) অভিযুক্তৰ মৃত্যু (Accused’s death) হয়।
সংগঠিত অপৰাধৰ বিৰুদ্ধে হাৰিয়ানা আৰক্ষী (Haryana Police)য়ে অভিযান আৰম্ভ কৰিছে। উক্ত অভিযানৰ অংশ হিচাপে আৰক্ষীয়ে এজন যাৱজ্জীৱন কাৰাদণ্ডৰ শাস্তি পোৱা দোষীক বিচাৰিবলৈ আৰম্ভ কৰে। গোপাল নামৰ দোষীজনৰ বিৰুদ্ধে বহু অপৰাধমূলক গোচৰ আছিল। ন্যায়াধীশে তেওঁক যাৱজ্জীৱন কাৰাদণ্ডৰ শাস্তি প্ৰদান কৰে। কেইবাদিনো কাৰাগাৰত থকাৰ পিছত আদালতত পেৰ’লৰ বাবে আৱেদন কৰে গোপালে। পেৰ’লত জেলৰ পৰা ওলাই আহি হত্যাৰ ষড়যন্ত্ৰত লিপ্ত হয়। এনডিটিভিক দিয়া এক সাক্ষাৎকাৰত স্থানীয় আৰক্ষী আয়ুক্ত মমতা সিঙে কয়, “গোপালে নিজৰ এজন শত্ৰুক হত্যা কৰিবলৈ ঘূৰি ফুৰিছিল। সেই চোৰাংচোৱা তথ্যৰ ভিত্তিত আৰক্ষীয়ে তেওঁক গ্ৰেপ্তাৰ কৰিবলৈ অভিযান চলাইছিল।”
আৰক্ষীৰ দাবী যে গ্ৰেপ্তাৰৰ পৰা হাত সাৰিবলৈ গোপালে আৰক্ষী জোৱানসকলৰ ওপৰত নিৰ্বিচাৰ গুলীচালনা কৰে। আৰক্ষীৰ বাহনখনত দুটা গুলী লাগে। আন এজন হেড কনিষ্টবল দেৱেন্দ্ৰৰ হাতত লাগে। আত্মৰক্ষাৰ বাবে আৰক্ষীয়েও পুনৰ গুলীচালনা কৰে। গুলীচালনাৰ সময়ত গুৰুতৰভাৱে আহত হয় গোপাল। অভিযুক্ত আৰু আহত আৰক্ষী জোৱানক উদ্ধাৰ কৰি চিকিৎসালয়লৈ প্ৰেৰণ কৰে। চিকিৎসকে গোপালক পৰীক্ষা কৰি মৃত ঘোষণা কৰে। চিকিৎসাধীন হৈ আছে দেৱেন্দ্ৰ। অৱশ্যে তেওঁৰ শাৰীৰিক অৱস্থা সুস্থিৰ।
আৰক্ষীৰ ৰেকৰ্ডত প্ৰকাশ পাইছে যে গোপাল শোনিপাট জিলাৰ অটৱাল গাঁৱৰ বাসিন্দা। তেওঁৰ অপৰাধজনিত ইতিহাস বহু পুৰণি। ২০১০ চনত হত্যাকাণ্ডৰ গোচৰত দোষী সাব্যস্ত হোৱাৰ পিছত ২০১৬ চনত গনৌৰ অঞ্চলৰ আন এটা হত্যাকাণ্ডৰ গোচৰত যাৱজ্জীৱন কাৰাদণ্ডৰ শাস্তি লাভ কৰে। চলিত বৰ্ষৰ ফেব্ৰুৱাৰী মাহত ৭০ দিনৰ পেৰ’লত গোপালক জেলৰ পৰা মুকলি কৰি দিয়া হৈছিল। পেৰ’লত থকাৰ সময়ত তেওঁ কেইবাটাও অপৰাধমূলক কাৰ্য সংঘটিত কৰিছিল। সুৰাৰ দোকানত আক্ৰমণ, অগ্নিসংযোগ, গাড়ী চুৰি, এজন ব্যক্তিক হত্যাৰ চেষ্টা আদি অভিযোগৰ সৈতে গোপালৰ নাম জড়িত হৈ আছে। পেৰ’লৰ ম্যাদ উকলি যোৱাৰ পিছতো তেওঁ আত্মসমৰ্পণ কৰা নাছিল। পলাতক হৈ আছিল তেওঁ। আৰক্ষীয়ে তেওঁৰ সন্ধানত অভিযান আৰম্ভ কৰে। অৱশেষত আৰক্ষীৰ সৈতে হোৱা সংঘৰ্ষত মৃত্যু হয় গোপালৰ।
