ডিফুত জম্মু কাশ্মীৰৰ পৰা সংবিধানৰ ৩৭০ ধাৰা প্ৰত্যাহাৰৰ বিৰুধিতা, মূল্যবৃদ্ধি ৰোধ স্বায়ত্ত শাসনৰ দাবীলৈ চিপিআই (এমএল) কে ধৰি কেইবাটাও সংগঠনৰ ধৰ্ণা

ASSAM TIMES POST

ডিফুঃ জম্মু কাশ্মীৰত প্ৰযোজ্য হৈ থকা ভাৰতীয় সংবিধানৰ ৩৭০ অনুশ্ছেদ বাতিলৰ বিৰোধিতা কৰাৰ লগতে শেহতীয়াকৈ অত্যাৱশ্যকীয় সামগ্ৰীৰ অস্বাভাৱিক মূল্যবৃদ্ধি আৰু কাৰবি আংলং আৰু ডিমা হাচাওকে সাঙুৰি এখন স্বায়ত্ত ৰাজ্য গঠনৰ দাবীত আজি ডিফুৰ ছেমছনছিং ইংতি মেম’ৰিয়েল পাৰ্কৰ সন্মূখত চিপিআই (এমএল) কে ধৰি কেইবাটাও সংঘটনে অৱস্থান ধৰ্ণা কাৰ্যসূচী ৰূপায়ণ কৰাৰ লগতে উত্তাল প্ৰতিবাদ সাব্যস্ত কৰে ৷

পাহাৰীয়া জিলাখনৰ আগশাৰীৰৰ চিপিআই (এমএল) নেতা ৰবি কুমাৰ ফাংচ’ই প্ৰতিবাদী কাৰ্যসূচীত অংশ গ্ৰহণ কৰি সাংবাদিকৰ আগত কয়যে, নৰেন্দ্ৰ মোদী নেতৃত্বাধীন বিজেপি চৰকাৰ দ্বিতীয়বাৰৰ বাবে ক্ষমতালৈ আহিয়েই জম্মু কাশ্মীৰৰ পৰা সংবিধানৰ ৩৭০ অনুশ্ছেদ বাতিল কৰি জম্মু-কাশ্মীৰৰ জনসাধাৰণক হেঁচা প্ৰয়োগ কৰাৰ লগতে মোবাইল ইণ্টাৰনেট সেৱা বন্ধ কৰি সাধাৰণ জনতাক পণবন্ধী কৰি ৰাখিছে ৷

চৰকাৰৰ নিতীৰ প্ৰতিবাদ কৰিব বিচৰা সকলক কাৰাগাৰলৈ প্ৰেৰণ কৰাৰ লগতে সৰু সৰু ল’ৰাকো কাৰাৰুদ্ধ কৰা হৈছে বুলি নেতা গৰাকীয়ে অভিযোগ উত্থাপন কৰাৰ লগতে অতি অমানৱীয়ভাবে এই সকল লোকক চৰকাৰে হাৰাশাস্তি কৰি অহা হৈছে বুলি ক্ষোভ উজাৰে ৷ এনে অৱস্থাত যোৱা দুটা মাহে কাশ্মীৰত স্বাভাৱিক অৱস্থা ঘূৰাই অনাৰ বিপৰীতে মৌলিক অধিকাৰ খৰ্ব কৰা হৈছে বুলি আক্ষেপ প্ৰকাশ কৰে বামপন্থী নেতা গৰাকীয়ে ৷

ৰবি কুমাৰ ফাংচ’ৱে ইয়াকো কয়যে, অত্যাৱশ্যকীয় সামগ্ৰীৰ গগণচুম্বী মূল্যবৃদ্ধিৰ বাবে জনসাধাৰণে চৰম অস্বস্তি ভোগ কৰি আছে ৷ আনহাতে কাৰবি আংলং আৰু ডিমা হাচাওৰ ৰাইজে ভোগ কৰি অহা ষষ্ঠ অনুসূচীৰ ২৪৪ (ক) ৰ ক্ষমতা সমূহো এপদ- দুপদকৈ কাঢ়ি নিছে বুলি অভিযোগ কৰি কয়যে, জম্মু -কাশ্মীৰৰ পৰা অনুশ্ছেদ ৩৭০ বাতিল কৰাৰ আৰ্হিৰে পাহাৰীয়া জিলা দুখনৰ ষষ্ঠ অনুসূচীৰ ২৪৪(ক)ৰ সুবিধা কাঢ়ি নিব পাৰে বুলি পাহাৰীয়া জিলা দুখনৰ ৰাইজ শংকিত হৈ  পৰিছে ৷

আজিৰ প্ৰতিবাদী কাৰ্যসূচীত ক্ৰমে, এইছএছডিচি, কেএছএ, কেএনচিএ, আৰৱাইএ, আইছা, আইপোৱা, এছৱাইজে, এছৱাইচি,কানকিচ, নিৰ্মাণ শ্ৰমিক এআইচিটিও আদি সংগঠনে অংশ গ্ৰহণ কৰে ৷