নিউজ ডেস্কঃ
দেশৰ বিপন্ন পৰিস্থিতিতো এক প্রেমৰ সম্পর্কই সফল পৰিণতি লাভ কৰিলে। আৰম্ভণি হৈছিল ২০২০ চনত। অতিমাৰি পৰিবেশত প্রথম লকডাউন জাৰি হোৱাত কেইদিনমান পূৰ্বে দিল্লীলৈ ফুৰিবলৈ আহিছিল আনা হোৰোডেটস্কা। ইউক্রেইনৰ কিভৰ বাসিন্দা তেওঁ। কিন্তু লকডাউনৰ কাৰণে আবদ্ধ হৈ পৰিছিল ভাৰতত। সেই সময়ত বন্ধুত্ব গঢ়ি উঠে দিল্লী হাইকোর্টৰ এজন অধিবক্তা অনুভৱ ভাসিনৰ সৈতে। বন্ধুত্বৰ পৰা লাহে লাহে প্রেমৰ সম্পর্ক আৰম্ভ হয় তেওঁলোকৰ। ইয়াৰ পিছত দেশলৈ উভতি যায় আনা। কিন্তু তাৰ পিছতো নিয়মিত যোগাযোগ আছিল তেওঁলোকৰ মাজত। দিল্লী আৰু কিভৰ মাজত হাজাৰ হাজাৰ মাইলৰ দূৰত্ব থাকিলেও, আনা-অনুভৱৰ মনৰ দূৰত্ব কেতিয়াও কমা নাছিল।
ইয়াৰ পিছতেই ইউক্রেইনৰ ওপৰত আক্ৰমণ আৰম্ভ কৰে ৰাছিয়াই। যুদ্ধ আৰম্ভৰ পিছৰ পৰা কিভ এৰি নিৰাপদ আশ্রয়ত, নতুবা প্রতিবেশী দেশবোৰলৈ পলাবলৈ আৰম্ভ কৰে ইউক্রেইনীয়সকলে। কিন্তু সকলোৰে দৰে পোলেণ্ড বা হাঙ্গেৰীলৈ নাযায় আনা। দিল্লীলৈ তেওঁৰ মনৰ মানুহৰ ওচৰলৈয়েই ঘূৰি আহিব বিচাৰিছিল। সেয়ে পলম নকৰি যুদ্ধবিধ্বস্ত ইউক্রেইন এৰি দিল্লী উদ্দেশ্যে ৰাওনা হয় আনা।
প্রথমে কিভৰ পৰা পলাই লুভিভলৈ যায় আনা। তাৰ পিছত শ্লোভাকিয়া সীমান্তত উপস্থিত হয়। অনুভৱৰ বন্ধুসকলৰ সহায়ত আনাই পোলেণ্ডলৈ যায়। তাত ভাৰতীয় দূতাবাসৰ পৰা ভিছাৰ অনুমতি লাভ কৰি দিল্লীলৈ উৰা মাৰে তেওঁ। আনহাতে, নিজ দেশ, নিজৰ প্রিয় মানুহক এৰি দিল্লীলৈ আহিছে আনা৷ সেয়ে এই মুহূর্তটো চিৰস্মৰণীয় কৰি ৰাখিব বিচাৰিছিল অনুভৱে। বিয়া কৰোৱাৰ পৰিকল্পনা অৱশ্যে পূৰ্বৰ পৰাই আছিল। কিন্তু বিমানবন্দৰত আনাই ভৰি থোৱাৰ লগে লগেই তাত তেওঁক বিয়াৰ প্রস্তাৱ দিয়ে অনুভৱে। আগন্তুক এক মাহৰ ভিতৰত শুভ দিন-ক্ষণ চাই আনাক বিয়া কৰাব অনুভৱে। তাৰ পিছতেই দেশৰ নাগৰিকত্বৰ বাবে আবেদন কৰিব তেওঁ।
