ডিফুত অস্ত্ৰ-শস্ত্ৰ সহ ১ ডিএনএলএ লিংকমেন আটক

ASSAM TIMES POST
ডিফুঃ শুকুৰবাৰে দিন দুপৰতে ডিফু চহৰৰ মাজ মজিয়াত অস্ত্ৰ- শস্ত্ৰ সহ এটা ডিএনএল কেডাৰ আটক হোৱা ঘটনাই চাঞ্চল্যৰ সৃষ্টি কৰিছে ৷

আৰক্ষীৰ সূত্ৰে জানিব পৰা অনুসৰি কালি সন্ধিয়া মাঞ্জাত গ্ৰেণেড নিক্ষেপ কৰা ঘটনাৰ পাছত মাঞ্জা থানাৰ গোচৰ নং ২৮/ ১৯ ভা:দ:বি: আইনৰ ধাৰা ১২০ (খ)/৩৮৭/৩৪ আৰু আৰ ডব্লিউ ধাৰা ৪/৫ ই, চি অনুসৰি তদন্ত আৰম্ভ কৰে আৰু আজি বিশ্বস্ত সুত্ৰৰ পমখেদি মাঞ্জা থানা, ডিফু নগৰ আৰক্ষী চকী, আৰু ধনশিৰি আৰক্ষী চকীৰ ভাৰপ্ৰাপ্ত বিষয়া, ক্ৰমে জিতুমনি ডেকা, হাওকাম চাংছন, আৰু ৰাজু বাহাদুৰ ছেত্ৰীৰ নেতৃত্বত চিআৰপি এফৰ( ডি) কোম্পানীৰ এটি দলে ডিফু চহৰৰ ১ নং পুলিছ পইণ্টৰ কাষত খাপ পিটি থাকোতে কাউঞ্চিলৰ দিশৰ পৰা AS 09 AC 8034 নম্বৰৰ যাত্ৰীবাহী অট’ ৰিক্সাখন চলাই ডিএনএলএৰ লিংকমেন উক্ত ঠাইত উপস্থিত হয় ৷

লগে লগেই পূৰ্বৰে পৰা খাপ পিটি থকা আৰক্ষী আৰু চি আৰপিএফৰ দলটোৱে ডিএনএলএ লিংকমেনটোক অট’ৰিক্সাখনৰ পৰা আটক কৰে ৷ ধৃত লিংকমেনটোৰ পৰা আৰক্ষীয়ে লিংকমেনটোৱে ব্যৱহাৰ কৰা অট’ৰিক্সা, এটা ‘২২ পিষ্টল, চাৰি জাঁই ‘ ২২ৰ সজীব গুলী আৰু এটা মোবাইল হেণ্ডছেট উদ্ধাৰ কৰিবলৈ সক্ষম হয় ৷ ধৃত লিংকমেনটো বকলিয়া ঘাট চিকাৰী পথাৰৰ প্ৰবিত্ৰ দাসৰ পুত্ৰ সুৰজিত দাস (৩০) বুলি চিনাক্ত কৰা হৈছে ৷

ধৃত সুৰজিত দাস বৰ্তমান ডিফু ৰেল কল’নিত থাকে যদিও উগ্ৰপন্থী সংগঠন ডিএনএলএৰ হৈ কাম কৰি মাঞ্জাৰ বিভিন্ন জনৰ পৰা ধনদাবী কাৰ্যত জড়িত হৈ আহিছে বুলি আৰক্ষীৰ পৰা জানিব পৰা গৈছে লগতে ধৃত কেডাৰটোৰ লগত ডিএনএলএ নেতাৰ সঘনাই মোবাইলত যোগাযোগৰ সম্ভেদ লাভ কৰিছে বুলি আৰক্ষীৰ সূত্ৰটোত প্ৰকাশ ৷

কালি মাঞ্জাত ব্যৱসায়িক প্ৰতিষ্ঠানত গ্ৰেণেড নিক্ষেপ কাৰ্যতো ধৃত সুৰজিত দাস জড়িত আছে বুলি আৰক্ষীয়ে সন্দেহ প্ৰকাশ কৰিছে ৷ ধৃত লিংকমেনটোৰ পৰা অধিক তথ্য জনাৰ বাবে আৰক্ষীয়ে লিংকমেনটোক জেৰা অব্যাহত ৰাখিছে বুলি জানিব পৰা গৈছে ৷