সোমবাৰে পুৱা ৯.৩০ বজাত এটি পুত্র সন্তানৰ জন্ম দিয়ে। তাৰ ১৫ মিনিটমান পিছতেই বহিল জীৱনৰ অন্যতম পৰীক্ষাত। তেতিয়া পুৱা ৯.৪৫ বজা। উচ্চ মাধ্যমিক পৰীক্ষাত বহে শ্রেয়সী সৰকাৰ (১৮)। মুর্শিদাবাদৰ সুতি থানাৰ আহিৰণ ঘোষপাড়া এলেকাৰ ঘটনাটো।
সন্তান জন্ম দিয়াৰ পিছত শাৰীৰিক দুৰ্বলতা সহ্য কৰি আৰু দুর্বল শৰীৰ লৈয়ে শ্রেয়সীয়ে পৰীক্ষাত বহাৰ অদম্য ইচ্ছাক সকলোৱে চেলুট জনাইছে।
২০১৪ চনত এক পথ দুর্ঘটনাত পিতৃক হেৰুৱাইছিল শ্রেয়সীয়ে। তাৰ পিছত তেওঁৰ নিজৰ স্কুল বাঙ্গাবাড়ি হাইস্কুলৰ প্রধান শিক্ষক আৰু অন্যান্য শিক্ষকসকলৰ সহযোগিতাত স্কুলখনৰ ছোৱালী হোষ্টেলত থাকে আর্থিক প্রতিকূলতাৰ মাজতো পঢ়া-শুনা চলাই যায় তেওঁ।
ইয়াৰ মাজতেই ঘৰৰ লোকসকলৰ হেঁচাত তিনি বছৰমান পূৰ্বে তেওঁৰ বিয়াও হৈ যায়। কিন্তু বিয়া হোৱাৰ পিছতো পঢ়া-শুনাৰ ইচ্ছা থাকিয়ে যায় তেওঁৰ।
একাদশ শ্রেণীত পঢ়ি থকাৰ সময়ত গর্ভৱতী হয় তেওঁ। চিকিৎসকে সম্ভাব্য প্রসৱৰ দিন দিছিল ২৬ এপ্রিল। কিন্তু সোমবাৰে ইংৰাজী পৰীক্ষাৰ দিনাই পুৱাতে প্রসৱ বেদনা আৰম্ভ হয় শ্রেয়সীৰ। সেয়ে ঘৰৰ মানুহে তেওঁক ভোৰবেলা আহিৰণ গ্রামীণ হস্পিটেলত ভর্তি কৰায়। পুৱা ৯.৩০ বজাত এটি পুত্র সন্তানৰ জন্ম দিয়ে শ্রেয়সীয়ে।
লেবাৰ ৰুমৰ পৰা ওলায়েই ১৫ মিনিটমানৰ পিছতে পৰীক্ষাতে বহাৰ বাবে প্ৰস্তুত হয় তেওঁ। স্কুল কর্তৃপক্ষ আৰু শিক্ষা বিভাগৰ সহযোগিতাত হস্পিটেলৰ বিছনাতে বহি ইংৰাজীৰ পৰীক্ষা দিয়ে শ্রেয়সীয়ে। আনহাতে, সন্তানক কাষত লৈ পৰীক্ষা দিয়াৰ পিছত শ্রেয়সীয়ে জনাইছে, আজি তেওঁৰ পৰীক্ষা ভাল হৈছে আৰু আশা কৰিছে ভাল ফলাফল দেখুৱাব।
