বিদ্যুৎ বিভাগৰ বৈঠালাংছʼস্থিত নিয়ন্ত্ৰণ কক্ষত শতাধিক লোকৰ উত্তাল প্ৰতিবাদ ।

পশ্চিম কাৰ্বিআংলং: পশ্চিম কাৰ্বি আংলং জিলাৰ ডংকামোকাম বিদ্যুৎ উপ সংমণ্ডলৰ অন্তৰ্গত বৈঠালাংছʼস্থিত বিদ্যুৎ বিভাগৰ নিয়ন্ত্ৰণ কক্ষত শতাধিক লোকে প্ৰতিবাদ সাব্যস্ত কৰিছে । বিভাগটোৰ কৰ্মচাৰীয়ে কোনো কাৰণ নোহোৱাকৈ দূৰ্গা পূজাৰ পূৰ্বে মাজ বৰপথাৰত থকা এটা ট্ৰেন্সফৰ্মাৰ পৰা বিদ্যুৎ সংযোগ কাটি দিয়ে । ইয়াৰ পিছৰে পৰা বিগত ছয়দিন দিন ধৰি বিদ্যূৎ সেৱা লাভৰ পৰা বঞ্চিত হৈ আছে বৰপথাৰ অঞ্চলৰ শতাধিক পৰিয়াল । ইফালে বিদ্যুৎ বিভাগৰ সৈতে যোগাযোগ কৰি অঞ্চলবাসীয়ে কোনো সুফল নোপোৱাত অঞ্চলটোৰ শতাধিক ৰাইজে বুধবাৰে বিভাগটোৰ বৈঠালাংছʼস্থিত নিয়ন্ত্ৰণ কক্ষ চৌহদত তীব্ৰ প্ৰতিবাদ সাব্যস্ত কৰে । আনহাতে বিদ্যুৎ কৰ্মচাৰীয়ে বিদ্যুৎ সংযোগ কৰি দিয়াৰ নামত ধন দাবী কৰাৰ লগতে ট্ৰেন্সফৰ্মাৰৰ বেৰেল সংযোগ কৰি দিয়াৰ বাবেও উৎকোচ বিচৰাৰ বাবে অতিষ্ঠ হৈ পৰে গ্ৰাহকসকল । এনে কৰ্ম কাণ্ডৰ বাবেই ৰাইজ একত্ৰিত হৈ প্ৰতিবাদত নামি পৰে । তাৎপৰ্যপূৰ্ণভাৱে এতিয়ালৈকে প্ৰতিবাদস্থলীত বিভাগটোৰ কোনো উচ্চ পদস্থ বিষয়া উপস্থিত হোৱা নাই ।