ASSAM TIMES POST
গুৱাহাটীঃ সদৌ অসম ছাত্ৰ সন্থাৰ বৰ্তমানৰ বিষয়ববীয়া বিপুল ৰাভাৰ ভাতৃ তথা সদৌ গুৱাহাটী ছাত্ৰ সন্থা আৰু সদৌ গুৱাহাটী বিদ্যালয় ছাত্ৰ সন্থাৰ প্ৰাক্তন নেতা নিৰেশ্বৰ ৰাভাই দেওবাৰে নিশা ১২ বজাত হায়াত হাস্পতালত শেষ নিশ্বাস ত্যাগ কৰে।
তেওঁৰ মৃত্যুৰ লগে লগে হাস্পতালখনত সদৌ অসম ছাত্ৰ সন্থাৰ মুখ্য উপদেষ্টা ডঃ সমুজ্জ্বল কুমাৰ ভট্টাচাৰ্য তথা আছুৰ আন-আন বিষয়ববীয়াসকল উপস্থিত হৈ ছাত্ৰ সন্থাৰ পতাকা তেওঁৰ নিথৰ দেহত দি শেষ শ্ৰদ্ধা জ্ঞাপন কৰে। ইফালে নিশাটো তেওঁৰ নিথৰ দেহটো জটিয়াস্থিত বাসভৱনতে ৰাখি সোমবাৰে দিনত জটিয়া শ্মশানত সৎকাৰ কৰা হয়।
সদ্য প্ৰয়াত ৰাভাই স্কুলীয়া শিক্ষা সাং কৰিছিল গুৱাহাটীৰ গোপাল বড়ো চৰকাৰী উচ্চতৰ মাধ্যমিক বিদ্যালয়ত। ইয়াৰ পাছত আৰ্য বিদ্যাপীঠ মহাবিদ্যালয়ত নামভৰ্তি কৰা ৰাভা আছিল একেধাৰে সদৌ গুৱাহাটী বিদ্যালয় ছাত্ৰ সন্থাৰ সভাপতি আৰু সদৌ গুৱাহাটী ছাত্ৰ সন্থাৰ উপ-সভাপতি। ৰাভাই অসম আন্দোলনত আন্দোলনকাৰীসকলক সন্মুখৰপৰাই নেতৃত্ব দিছিল।
তেওঁ দিছপুৰ আৰু সদৌ গুৱাহাটী গণ সংগ্ৰাম পৰিষদৰো বিষয়ববীয়া আছিল। বৰাক উপত্যকাত আছুৰ জন্ম আৰু প্ৰসাৰৰ ক্ষেত্ৰত প্ৰয়াত ৰাভাই এক বিশেষ ভূমিকা লৈছিল। গোপাল বড়ো চৰকাৰী উচ্চতৰ মাধ্যমিক বিদ্যালয়ৰ ছাত্ৰ একতা সভাৰ সাধাৰণ সম্পাদকৰ আসনখনো অলংকৃত কৰা ৰাভাই অসম আন্দোলনৰ সময়ত কেবাবাৰো আৰক্ষী, অৰ্ধ সামৰিক বাহিনীৰ নিৰ্যাতনৰ বলি হৈছিল। বৃহত্তৰ গণেশগুৰি ৰঙালী বিহু সন্মিলনৰ অন্যতম প্ৰতিষ্ঠাপক ৰাভাই মৃত্যুৰ সময়ত পত্নী, দুগৰাকী জ্যেষ্ঠ ভগ্নীক এৰি থৈ যায়।
