মৰিয়নিৰ সমীপৰ নকছাৰীৰ খাটিসোনা নামে ঠাইত একেটা পৰিয়ালৰে তিনিজনকৈ লোকক ঘপিয়াই এক লোমহৰ্ষক হত্যাকাণ্ডৰ ঘটনা সংঘটিত হৈছে। মৰিয়নিৰ দেবেৰাপাৰ আৰক্ষী চকীৰ অন্তৰ্গত খাটিসোনা অঞ্চলৰ এটা ইটাভাটাৰ শ্ৰমিকৰ আৱাসগৃহত থকা তিনিজনীয়া এটা পৰিয়ালক দাৰে ঘপিয়াই হত্যা কৰে।
হত্যাৰ বলি হোৱা পৰিয়ালটো সদস্য কেইজন ক্ৰমে সোনটি বৰা (৫০), তেওঁৰ পত্নী তুলু বৰা(৪৫)আৰু জীয়ৰী মনালিছা বৰা (২৩ ) বুলি আৰক্ষীয়ে নিশ্চিত কৰিছে।
যোৱা ৰাতি হোৱা প্ৰবল বৰষুণৰ সময়তে এই হত্যাকাণ্ড সংঘটিত হোৱা সন্দেহ কৰিছে আৰক্ষীয়ে। আজি পুৱা স্থানীয় কিশোৰে মাছ ধৰিবলৈ আহোতে মৃতদেহ কেইটা প্ৰত্যক্ষ কৰে আৰু তাৰ পিছতেই সমগ্ৰ ঘটনা পোহৰলৈ আহে। মহিলা আৰু যুৱতী দুগৰাকী অৰ্ধ উলংগ অৱস্থাত আছিল।
মৃতদেহকেইটাৰ শৰীৰৰ কেবাঠাইটো দাৰে ঘপিওৱাৰ সুস্পষ্ট দাগ আছে। মৰণোত্তৰ পৰীক্ষাৰ অন্ততহে সকলো পোহৰলৈ আহিব বুলি আৰক্ষীৰ সূত্ৰই জানিবলৈ দিয়ে। পিছত তিতাবৰৰ দণ্ডাধীশ ডাঃ বিশ্বজিত বৰাৰ উপস্থিতিত মৃতদেহ কেইটা আৰক্ষীয়ে উদ্ধাৰ কৰি মৰণোত্তৰ পৰীক্ষাৰ বাবে যোৰহাট চিকিৎসা মহাবিদ্যালয় আৰু হস্পিতেললৈ প্ৰেৰণ কৰে ।
ইতিমধ্যে ঘটনাস্থলীৰ পৰা আৰক্ষীয়ে দুখনকৈ চোকা দা, এটা ট’ৰ্চ লাইট, এটা বেগ, এটা চোলাকে ধৰি কেবাটাও সামগ্ৰী উদ্ধাৰ কৰিবলৈ সক্ষম হৈছে। মৃত্যু হোৱা মহিলা গৰাকীক ঘৰৰ বাহিৰত হত্যা কৰা বুলিও আৰক্ষীয়ে সন্দেহ কৰিছে।
জানিব পৰা মতে, এই খাটিসোনা অঞ্চলৰ জে বি এফ নামৰ ইটাভাটাটোৰ শ্ৰমিকৰ অস্থায়ী ঘৰত সোনটি বৰাৰ তিনিজনীয়া পৰিয়ালটোৱে বাস কৰিছিল । পূৰ্বতে ঘটনাস্থলীৰ পৰা কেইকিলোমিটাৰ মান আঁতৰৰ আন এডোখৰ ঠাইত থকা পৰিয়ালটোৱে প্ৰায় এমাহমানৰ পূৰ্বেহে এই ঠাইত আহি থাকিবলৈ লৈছিল ।
সম্প্ৰতি বিশ্বজিত ফুকন নামৰ এজন লোকৰ তত্বাৱধনাত উক্ত ইটাভাটাটো আছে যদিও স্থানীয় দুজনমান যুৱকেহে ইটাভাটাটো চোৱা চিতা কৰে বুলি স্থানীয় লোকে জানিবলৈ দিছে । ইটা ভাটাতেই শ্ৰমিক হিচাপে কাম কৰা সোনটি বৰাৰ ঘৰ লক্ষীমপুৰত । বৰ্তমান ইটা ভাটাসমূহ বন্ধ হৈ থকাৰ বাবে ভঙা চিঙা লোহা আদি কিনা বেচা কাম কৰিছিল সোনটি বৰাই ।
আজি ঘটনাস্থলীত যোৰহাটৰ আৰক্ষী অধীক্ষক মহনলাল মীনা, অতিৰিক্ত আৰক্ষী অধীক্ষক মৃন্ময় গোস্বামী, তিতাবৰ মহকুমাৰ মহকুমা আৰক্ষী বিষয়া গায়ত্ৰী ডেকা, মৰিয়নি আৰক্ষী চক্ৰৰ চক্ৰ পৰিদৰ্শক দণ্ডীৰাম বৰা, মৰিয়নি আৰক্ষী থানাৰ ভাৰপ্ৰাপ্ত আৰক্ষী বিষয়া ত্ৰিলোচন নাথ, দেবেৰাপাৰ আৰক্ষী চকীৰ ভাৰপ্ৰাপ্ত আৰক্ষী বিষয়া অৰবিন্দ ঘোষ আদি আৰক্ষীৰ শীৰ্ষ বিষয়াসকল উপস্থিত হৈ ঘটনাৰ বুজ লোৱাৰ লগতে অনুসন্ধান আৰম্ভ কৰে।
আৰক্ষীয়ে প্ৰাথমিক অনুসন্ধানৰ অন্তত হত্যাকাৰীৰ সন্ধান পোৱা বুলি জানিবলৈ দিছে । আৰক্ষীৰ এক সূত্ৰই জানিবলৈ দিয়া মতে, ভেলেউগুৰি অঞ্চলৰ এজন ব্যক্তি এই হত্যাকাণ্ডত জড়িত আছে। ব্যক্তিজন মৎস্য ব্যৱসায়ৰ সৈতেও জড়িত থকাৰ সন্দেহ ব্যক্ত কৰিছে আৰক্ষীয়ে। অৱশ্যে ঘটনাৰ তদন্তৰ খাতিৰত আৰক্ষীয়ে অধিক তথ্য দিবলৈ অস্বীকাৰ কৰে ।
তাৰোপৰি আৰক্ষীয়ে স্নিফাৰ ডগৰ সহায়ত হত্যাকাৰী অনুসন্ধান কৰে। আৰক্ষীৰ প্ৰশিক্ষণপ্ৰাপ্ত কুকুৰটোৱে ঘটনাস্থলীৰ পৰা কেই কিলোমিটাৰ মান আঁতৰত থকা ভেলেউগুৰি অঞ্চললৈ যায় যদিও নিমাতী চাৰি নামৰ ঠাইডোখৰৰ পৰা আগবাঢ়ি যোৱা পৰিলক্ষিত নহ’ল। আজিৰ এই লোমহৰ্ষক হত্যাকাণ্ডৰ ঘটনাটোৱে অঞ্চলটোৰ লগতে সমগ্ৰ জিলাখনতে ব্যাপক চাঞ্চল্যৰ সৃষ্টি কৰিছে ।
