মহাৰাষ্ট্র বিধানসভাত বৃহস্পতিবাৰে আস্থাভোটত অৱতীৰ্ণ হ’ব লাগিব উদ্ধৱ থাকৰে। ৰাজ্যপালৰ নির্দেশৰ ওপৰত স্থগিতাদেশ বিচাৰি শিৱসেনাই যি আবেদন জনাইছিল বুধবাৰে সুদীর্ঘ চাৰে তিনি ঘণ্টা শুনানিৰ পিছত সেয়া নাকচ কৰে শীৰ্ষ আদালতে।
বুধাবাৰে বিয়লি ৫ বজাৰ পৰা শিৱসেনাৰ আবেদনৰ শুনানি আৰম্ভ হয় ন্যায়াধীশ সূর্যকান্ত আৰু জেবি পাড়িয়ালাৰে গঠিত শীর্ষ আদালতৰ বিচাৰপীঠখনে। নিশা ৮ টাৰ কিছু সময় পিছতে শুনানি শেষ কৰি বিচাৰপীঠে জনায় যে নিশা ৯ বজাত এই বিষয়ত নির্দেশ দিয়া হ’ব।
ইয়াৰ পিছত উদ্ধৱৰ আবেদন নাকচ কৰি দুই ন্যায়াধীশে জনায়, ৰাজ্যপালৰ নির্দেশ মতেই ১১ বজাত বিধানসভাৰ বিশেষ অধিবেশন আৰম্ভ হ’ব। আস্থাভোট শেষ কৰিব লাগিব বিয়লি ৫টাৰ ভিতৰত।
