কাৰ্বি ইউনাইটেড লিবাৰেচন আৰ্মি (কুলা) 2022 নামৰ নৱগঠিত উগ্ৰপন্থী সংগঠন এটাৰ নামত ফোনযোগে আৰু ধনদাবী পত্ৰৰে বিভিন্ন লোকৰ পৰা ধন দাবী কৰাৰ এক তথ্য লাভ কৰে বকলিয়া আৰক্ষী থানাই।
উক্ত তথ্যৰ ভিত্তিত কাৰিকৰী বিশ্লেষণ আৰু মানুহৰ পৰা লাভ কৰা বিভিন্ন তথ্যৰ ভিত্তিত কেইটামান সন্দেহজনক ফোন নম্বৰ আৰক্ষীয়ে ট্ৰেচ কৰিবলৈ সক্ষম হয়। তাৰে সহায়ত ডিফু থানাৰ অধীনৰ চাৰ হানছে গাঁৱৰ ঠেংতম হাঞ্চে ওৰফে আৰাক এজাং নামৰ এজন উগ্ৰপন্থীৰ সন্ধান লাভ কৰা হয় আৰু আৰক্ষীয়ে তেওঁক ধৰিবলৈ সক্ষম হয়।
পিছত তেওঁ স্বীকাৰ কৰে যে তেওঁ কুলাৰ বিত্ত সম্পাদক আৰু তেওঁক গ্ৰেপ্তাৰ কৰা হয়। ইয়াৰ পিছত তেওঁৰ তথ্যৰ ভিত্তিতে ২ নং বালিজান গাঁৱৰ প্ৰণৱ টিমুং ওৰফে ছেদাং টুনগান নামৰ কুলাৰ সাধাৰণ সম্পাদকজনক গ্ৰেপ্তাৰ কৰা হয়।
আনহাতে, ২ আগষ্টৰ মাজনিশা আৰু ৩ আগষ্টত গতিবিধি লক্ষ্য কৰি লাভ কৰা তথ্যৰ পিছত কুলাৰ অধ্যক্ষ ডেনিয়েল টেৰণ ডি পি ক্ৰনজাং আৰু অন্যান্য সদস্যসকলৰ সন্ধানত মাঞ্জা আৰক্ষীয়ে লাংভুকু অঞ্চলত অভিযান আৰম্ভ কৰে।
তাৰ পিছত কুলাৰ সদস্য আৰু আৰক্ষীৰ মাজত গুলীয়াগুলীৰ ঘটনা সংঘটিত হয়। এই সংঘৰ্ষত কুলাৰ ডেনিয়েল টেৰণ ওৰফে ডি পি ক্ৰনজাং আঘাতপ্ৰাপ্ত হয় আৰু তেওঁক লগে লগে ডিফুৰ ডিএমচিএইচলৈ স্থানান্তৰিত কৰা হয়।
উক্ত অভিযানত তলৰ মাৰণাস্ত্ৰসমূহ জব্দ কৰা হয়-
১. গুলী সহিতে এটা .২২ পিষ্টল।
২. গুলী সহিতে এটা এ কে মেগজিন
৩. এখন খুকুৰী
৪. কুলাৰ নামত ধন দাবী কৰা পেড
৫. কুলাৰ ছিল, অধ্যক্ষৰ ছিল, বিত্ত সম্পাদকৰ ছিল
৬. সামৰিক সাজ-পোছাক
৭. ধনদাবীৰ বাবে ব্যৱহাৰ কৰা মোবাইল ফোন আৰু চিম কাৰ্ড
৮. অন্যান্য নথিপত্ৰ
সমগ্ৰ অভিযানটোত নেতৃত্ব দিয়ে কাৰ্বি আংলঙৰ উপ আৰক্ষী অধীক্ষক নাহিদ কৰিশ্মা, তেওঁক সংগ দিয়ে হাওৰাঘাট আৰক্ষী থানাৰ অ’চি মঞ্জিত টেৰাঙ, মাঞ্জা থানাৰ অ’চি ৰমেন বৰদলৈ আৰু বকলিয়া থানাৰ অ’চি নৱজিত দাসে।আনহাতে, প্ৰযুক্তিগত দিশ বিশ্লেষণ কৰে ৰমেশ ছেত্ৰী আৰু কাৰ্বি আংলঙৰ চাইবাৰ চেলে।
