নীতিশ কুমাৰে পাটনাত জেডি(ইউ)ৰ সাংসদ-বিধায়ক-নেতাসকলৰ সৈতে বৈঠকত মিলিত হৈ এনডিএ ত্যাগৰ সিদ্ধান্ত লয়। লালু-কন্যা ৰোহিনী আৰ্য্যৰ হঠাৎ টুইট — ‘ৰাজতিলক কা কৰো তৈয়াৰী, আ ৰহে হায় লন্থনধাৰী’।
উক্ত টুইটত ৰোহিণীয়ে লেম্প হাতত লৈ আৰজেডি সমৰ্থকৰ এটা ভিডিঅ’ও পোষ্ট কৰে। তাত তেওঁলোকে ভোজপুৰী গীত গোৱা দেখা যায়- ‘লালু বিন চালু এ বিহাৰ না হয়’ (লালু অবিহনে বিহাৰ চলিব নোৱাৰিব)। লালুৰ লগতে তেজস্বীৰ ছবিও আছে তাত।
ৰোহিনীৰ এই বক্তব্যত স্পষ্ট- পাঁচ বছৰৰ পাছত লালুৰ দল আৰজেডি পুনৰ পাটনাত ক্ষমতাৰ অংশীদাৰ হʼবলৈ গৈ আছে। যাৰ প্ৰতীক লেম্প। ইতিমধ্যে লালু-পুত্ৰই জেডি(ইউ) আৰজেডি-কংগ্ৰেছ-বাওঁপন্থী ‘মহা জোটবন্ধন’ চৰকাৰত গুৰুত্বপূৰ্ণ পদ লাভ কৰিব পাৰে বুলি জল্পনা-কল্পনা চলিছে। আৰজেডিৰ এক সূত্ৰ অনুসৰি এইবাৰ গৃহ বিভাগৰ দায়িত্ব লাভ কৰিব পাৰে প্ৰাক্তন উপ-মুখ্যমন্ত্ৰী তেজস্বীয়ে।
উল্লেখ্য, ২০০২ চনত লালুৰ বন্ধু এজন আয়কৰ বিষয়াৰ পুত্ৰ ৰাও সমৰেশ সিঙৰ সৈতে বিবাহপাশত আবদ্ধ হয় ৰোহিনীয়ে। কিন্তু সক্ৰিয় ৰাজনীতিত তেওঁক তেনেদৰে দেখা পোৱা নগʼল। লালুৰ আন এগৰাকী কন্যা মিছা ভাৰতীয়ে ইয়াৰ পূৰ্বে ৰাজনীতিত প্ৰৱেশ কৰিছিল। ২০১৪ চনত পাটনাৰ লোকসভা নিৰ্বাচনত পৰাস্ত হোৱাত ৰাজ্যসভালৈ পঠোৱা হৈছিল। এইবাৰ ৰোহিনীয়ে সক্ৰিয় ৰাজনীতিত ভৰি দিব নেকি? তাক লৈও চলিছে চৰ্চা।
