বাংলাদেশৰ প্ৰধানমন্ত্ৰী শ্বেখ হাছিনাৰ প্ৰায় তিনি বছৰৰ মূৰত ভাৰত ভ্ৰমণ। চাৰিদিনীয়া ভ্ৰমণসূচীত দুয়োখন দেশৰ মাজত ৭টা চুক্তি স্বাক্ষৰ হোৱাৰ সম্ভাৱনা আছে।সংবাদ সংস্থাৰ সূত্ৰ অনুসৰি, জল আবণ্টন, ৰে’ল, বিজ্ঞান প্ৰযুক্তিকে ধৰি সাতখন চুক্তি স্বাক্ষৰ হোৱাৰ সম্ভাৱনা আছে।
বাংলাদেশৰ বৈদেশিক মন্ত্ৰী এ কে আব্দুল মোমেনে দেওবাৰে এইদৰে কয়। তেওঁ কয়,” শ্বেখ হাছিনাৰ ভ্ৰমণ সফল হʼব বুলি আশা কৰিছো। এই ভ্ৰমণে আমাক আমাৰ লক্ষ্যত উপনীত হোৱাত সহায় কৰিব।” বাংলাদেশৰ বৈদেশিক মন্ত্ৰীয়ে কয় যে দুয়োখন দেশৰ ৰাজ্যিক নেতাসকলৰ সৈতেও শক্তিৰ বিষয়ে আলোচনা কৰিব পাৰে। দুয়োখন দেশৰ মাজত বুজাবুজি চুক্তি স্বাক্ষৰ সন্দৰ্ভত মোমেনে লগতে কয় যে আলোচনা চলি আছে। চুক্তিৰ সংখ্যা আৰু বৃদ্ধি পাব পাৰে।
উল্লেখ্য, প্ৰধানমন্ত্ৰী নৰেন্দ্ৰ মোদীৰ আমন্ত্ৰণত সোমবাৰে ভাৰতলৈ আহিছে হাছিনা। দৰাচলতে মোদী আৰু হাছিনাৰ মাজত সদায় ভাল সম্পৰ্ক আছে। ইয়াৰ পূৰ্বে ২০১৯ চনৰ অক্টোবৰ মাহত ভাৰতলৈ আহিছিল হাছিনা।
ভাৰত ভ্ৰমণৰ পূৰ্বে সংবাদ সংস্থা এ এন আইক দিয়া এক সাক্ষাৎকাৰত হাছিনাই পানী বিতৰণৰ বিষয়ে কয়। তেওঁ কয়, “মই ভাবো এই সমস্যা সমাধান কৰা উচিত। এইটো এটা দীৰ্ঘদিনীয়া সমস্যা। প্ৰধানমন্ত্ৰী নৰেন্দ্ৰ মোডীও এই সমস্যা সমাধানৰ বাবে আগ্ৰহী।”
উল্লেখ্য, চাৰিদিনীয়া ভ্ৰমণৰ অন্তত অহা ৮ ছেপ্টেম্বৰত বাংলাদেশলৈ উভতি যোৱাৰ কথা হাছিনাৰ। তেওঁৰ ভ্ৰমণৰ প্ৰথমদিনাই দিল্লীৰ হজৰত নিজামুদ্দিন আউলিয়া দৰগাহলৈ যোৱাৰ কথা। প্ৰধানমন্ত্ৰী নৰেন্দ্ৰ মোদীৰ সৈতে হʼব দ্বিপাক্ষিক বৈঠক।
বাংলাদেশৰ প্ৰধানমন্ত্ৰীয়ে ৰাষ্ট্ৰপতি দ্ৰৌপদী মুৰ্মু আৰু উপ-ৰাষ্ট্ৰপতি জগদীপ ধনখৰ আৰু বৈদেশিক মন্ত্ৰী এছ জয়শংকৰক সাক্ষাৎ কৰাৰ কথা। ভ্ৰমণৰ শেষৰ দিনা ৰাজস্থানৰ আজমিৰ ভ্ৰমণ কৰিব। তাৰ পৰা বাংলাদেশলৈ উভতি যোৱাৰ কথা।
