গুজৰাট বিধানসভা নিৰ্বাচন : আহমেদাবাদৰ অটোচালকৰ ঘৰত নৈশ আহাৰ গ্ৰহণ অৰবিন্দ কেজৰিৱালৰ

আপ প্ৰধান তথা দিল্লীৰ মুখ্যমন্ত্ৰী অৰবিন্দ কেজৰিৱালৰ গুজৰাটৰ এজন অটোচালকৰ ঘৰত নৈশ আহাৰ গ্ৰহণ। জানিব পৰা মতে, আহমেদাবাদৰ এজন অটোচালকে কেজৰিৱালক নিশাৰ আহাৰ গ্ৰহণৰ বাবে আমন্ত্ৰণ জনায়। কেজৰিৱালে নিমন্ত্ৰণ ৰক্ষা কৰিবলৈ অটোত উঠি তেওঁৰ ঘৰলৈ যায়। কিন্তু গুজৰাট আৰক্ষীয়ে বাধা দিয়ে আৰু নিৰাপত্তাৰ স্বাৰ্থত এই কাম কৰা হৈছে বুলি কয়।

অৱশ্যে অৱশেষত আৰক্ষীয়ে কেজৰিৱালক যাবলৈ দিয়ে। উল্লেখ্য, চলিত বৰ্ষৰ শেষৰ ফালে গুজৰাট বিধানসভা নিৰ্বাচন। আৰু সেইবাবেই কেজৰিৱালে প্ৰচাৰ চলাবলৈ গুজৰাটলৈ যায়। সোমবাৰে বিয়লি আহমেদাবাদত অটোচালকৰ ৰেলীত অংশগ্ৰহণ কৰে কেজৰিৱালে। তাতেই তেওঁক বিক্ৰম দন্তনী নামৰ এজন অটোচালকে নিমন্ত্ৰণ জনায়।

তেওঁৰ ঘৰ ঘালোদিয়া অঞ্চলত। সোমবাৰে ৰেলীৰ অন্তত অটোচালকজনে কেজৰিৱালক কয়, “মই আপোনাৰ অনুৰাগী। ভিডিঅ’ত দেখিছিলো যে আপুনি পঞ্জাবৰ এজন অটো ড্ৰাইভাৰৰ ঘৰত খাদ্য খাইছিল। আজি ৰাতি মোৰ ঘৰলৈ নিশাৰ আহাৰ খাবলৈ আহিবনে?” কেজৰিৱালে এই প্ৰস্তাৱত সন্মতি প্ৰকাশ কৰে।

তেওঁ কয়, “পঞ্জাব আৰু গুজৰাটৰ অটো চালকসকলে মোক বহুত ভালপায়। আজি ৰাতি ৮ বজাত তোমাৰ ঘৰলৈ আহিম!” সোমবাৰে সন্ধিয়া প্ৰায় ৭.৩০ বজাত হোটেলৰ পৰা ওলাই কেজৰিৱালে অটোত উঠে। বাটত আৰক্ষীয়ে তেওঁক ৰখাই দিয়ে। অৱশ্যে শেষত সিদ্ধান্ত হয়, অটোত এজন আৰক্ষী বিষয়া লৈ অটোচালকৰ ঘৰলৈ যোৱাটো।