বৈদ্যুতিক শ্বৰ্ট চাৰ্কিটত আহত কৰ্মৰত বিদ্যুত কৰ্মী

ASSAM TIMES POST
ডিফুঃ বিদ্যুত বিভাগৰ চৰম গাফিলতিৰ বাবে আজি পুৱাতে ডিফু চহৰত সংঘটিত হ’ল এক চাঞ্চল্যকৰ ঘটনা ৷ বিদ্যুতৰ মেইন লাইনৰ কামত কৰ্মৰত এজন শ্ৰমিকৰ বৈদ্যুতিক শ্বৰ্ট চাৰ্কিটহৈ দগ্ধ হৈ আহত হৈ সম্প্ৰতি ডিফু অসামৰিক চিকিৎসালয়ত চিকিৎসাধীন ৷

প্ৰাপ্ত খবৰ অনুসৰি ডিফুত বিদ্যুত বিভাগৰ এনকে পাৱাৰ কোম্পানীৰ অধীনত আইপিডিএছৰ ১১ কেভি বিদ্যুতৰ কাম চলি থকাৰ বাবে কোম্পানীটোৰ প্ৰায় ১৫ জনীয়া দল এটাই পুৱাতেই ডিফু বেচৰকাৰী বাছ আস্থানৰ তিনি নং পুলিছ পইণ্টৰ কাষৰ এটি বৈদ্যুতিক পষ্টৰ কাম কৰিবলৈ যো-যা চলায় ৷ সেই মৰ্মে মেইন লাইনৰ কাম কৰিবলৈ ডিফু তাৰালাংছ’ নিবাসী শ’ভা গৌড়ৰ পুত্ৰ ৰাজেন গৌড় (২৬) প্ৰায় ৮ মিটাৰ উচ্চতাৰ পষ্টত বগাই মেইন লাইন ঠিক কৰাত লাগে ৷ অলপ সময় কাম কৰাৰ পিছত ৭-০৫ বজাত হঠাত মেইন লাইনত বন্ধ হৈ থকা বিদ্যুত সৰবৰাহ হবলৈ ধৰে ফলত ৰাজেন গৌড়ৰ শৰীৰত বৈদ্যুতিক শ্বৰ্ট চাৰ্কিট হৈ অৰ্দ্ধ দগ্ধ হৈ ওপৰতেই ওলমি ৰয় ৷

তৎক্ষণাত সহকৰ্মী সকলে ৰাজেন গৌড়ক ওপৰৰ পৰা নমাই আনি সংকট জনক অৱস্থাত ডিফু অসামৰিক চিকিৎসালয়ত ভৰ্তি কৰে ৷ আহত ৰাজেন গৌড়ে সাংবাদিকক জানিবলৈ দিয়া অনুসৰি কামটোৰ বাবে পুৱা ৬ বজাৰ পৰা ৯ বজালৈ সংশ্লিষ্ট লাইনৰ বিদ্যুত সৰবৰাহ কৰ্তন কৰা হৈছিল যদিও হঠাত ডিফুস্থিত পাৱাৰ হাউচৰ নিয়ন্ত্ৰণ কক্ষৰ পৰা কোনো লোকে বিত্যুতৰ সৰবৰাহ চালু কৰি দিয়াত এনে দূৰ্ঘটনা সংঘটিত হবলৈ পালে ৷ বিদ্যুত বিভাগৰ এনে গাফিলতিৰ বাবে হোৱা দূৰ্ঘটনাত সচেতন মহল আচৰ্য প্ৰকাশ কৰিছে ৷