অসমত নাবালিকাৰ বিবাহ ৰোধ (Minor marriages prevented in Assam) কৰাৰ ক্ষেত্ৰত সক্ৰিয় ৰাজ্যৰ বিজেপি চৰকাৰ। অসম আৰক্ষীয়ে এই পৰ্যন্ত ২,৭৬৩ জন লোকক গ্ৰেপ্তাৰ (People arrested) কৰিছে। মুঠ ৪১৩৫টা গোচৰ ৰুজু হৈছে।
অসম আৰক্ষীৰ তথ্য অনুসৰি, হোজাইত ২১৬ জন, নগাঁৱত ১৮৪ জন, ধুবুৰীত ১৮৩ জন, বাক্সাত ১৫৮ জন, বৰপেটাত ১৪৬ জন, বিশ্বনাথত ১৪০ জন, মৰিগাঁৱত ১২৮ জন, বঙাইগাঁৱত ১২১ জন, হাইলাকান্দিত ১১৮ জন, কৰিমগঞ্জ ১০৭ জন, কোকৰাঝাৰত ১০৮ জন, কামৰূপত ১০২ জন লোকক গ্ৰেপ্তাৰ কৰা হৈছে।
উল্লেখ্য, বিয়া হৈ যোৱা নাবালিকাৰ বাবে অসম চৰকাৰে শীঘ্ৰে পুনৰ্বাসন নীতি প্ৰৱৰ্তন কৰিব। স্বামীক গ্ৰেপ্তাৰ কৰা নাবালিকাসকলৰ বাবেও ৰাজ্য চৰকাৰে ব্যৱস্থা গ্ৰহণ কৰিবলৈ ওলাইছে। পুনৰ সংস্থাপনৰ বাবে তিনিজনীয়া কেবিনেট কমিটিও গঠন কৰা হৈছে। উক্ত সমিতিত আছে মন্ত্ৰী ৰানোজ পেগু, কেশৱ মহন্ত, অজন্তা নেওগ। এই কমিটীয়ে প্ৰতিবেদন দাখিল কৰাৰ পিছতহে অসম চৰকাৰে শিশু কইনাৰ পুনৰ্বাসনৰ নীতি আৰম্ভ কৰিব।
ইফালে বৃহস্পতিবাৰে অসমৰ মুখ্যমন্ত্ৰী হিমন্তবিশ্ব শৰ্মাই টুইটযোগে আৰক্ষীক অভিনন্দন জনায়। তেওঁ লিখিছে, ” নাবালিকাৰ বিবাহ ৰোধ কৰাৰ বাবে অসম আৰক্ষীৰ প্ৰচেষ্টাক প্ৰশংসা কৰিছোঁ। এই গ্ৰেপ্তাৰ অব্যাহত ৰাখিবলৈ আৰক্ষীক নিৰ্দেশ দিয়া হৈছে। বিবাহিত নাবালিকাৰ পুনৰ্বাসনৰ নীতি নিৰ্ধাৰণৰ বাবে গঠন কৰা হৈছে এখন কমিটী। এই সমিতিয়ে ১৫ দিনৰ ভিতৰত চূড়ান্ত পুনৰ্বাসন নীতি প্ৰণয়ন কৰিব।”
যোৱা সোমবাৰেও মুখ্যমন্ত্ৰীয়ে অসমৰ নাবালিকাৰ মাতৃত্বক লৈ উদ্বেগ প্ৰকাশ কৰিছিল। সমগ্ৰ ৰাজ্যৰ ভিতৰতে নাবালিকাৰ ভিতৰত মাতৃত্বৰ হাৰ সৰ্বাধিক বৰপেটা জিলাত। ২০২২ চনত নতুন মাতৃৰ ২৮.৭ শতাংশ নাবালিকা।
