তুৰস্ক-ছিৰিয়াত (Turkey-Syria) ভয়ংকৰ ভূমিকম্পৰ(Earthquake) ৯ দিনৰ মূৰত আৰু ৯ জন লোকক জীৱিত অৱস্থাত উদ্ধাৰ কৰা হয়। মঙলবাৰে জীৱিত অৱস্থাত উদ্ধাৰ হোৱা ১৭ আৰু ২১ বছৰীয়া দুজন ভাতৃও আছিল। তুৰস্কৰ কাহৰামানমাৰাছ প্ৰদেশৰ এটা এপাৰ্টমেণ্ট ব্লকৰ পৰা উদ্ধাৰ কৰা হয় তেওঁলোকক। ইফালে ভূমিকম্পত মৃত্যু হোৱা লোকৰ সংখ্যা ৪১ হাজাৰ অতিক্ৰম কৰিছে। এই খবৰ ৰয়টাৰ্ছৰ।
ভূমিকম্পৰ ২০০ ঘণ্টাৰো অধিক সময়ৰ পাছতে ধ্বংসাৱশেষৰ পৰা উদ্ধাৰ কৰিবলৈ সক্ষম হয় দুয়োকে। এজন উদ্ধাৰকাৰীয়ে কয় যে ধ্বংসাৱশেষৰ পৰা আৰু অধিক জীৱিত লোকক উদ্ধাৰ কৰাৰ সম্ভাৱনা আছে।
তুৰ্কীৰ ৰাষ্ট্ৰপতি ৰেচেপ টাইপ এৰদোগানে (Recep Tayyip Erdoğan) স্বীকাৰ কৰে যে প্ৰাৰম্ভিক উদ্ধাৰ অভিযানত সমস্যাৰ সৃষ্টি হৈছে। কিন্তু তেওঁ কয়, “পৰিস্থিতি এতিয়া নিয়ন্ত্ৰণত। আমি কেৱল আমাৰ দেশতে নহয়, মানৱতাৰ ইতিহাসৰ আটাইতকৈ ডাঙৰ প্ৰাকৃতিক দুৰ্যোগৰ সৈতে মোকাবিলা কৰিছো।”
এই সন্দৰ্ভত ৰাষ্ট্ৰসংঘই কৈছে যে দুয়োখন দেশৰ ভূমিকম্পৰ ফলত সত্তৰ নিযুততকৈও অধিক শিশু ক্ষতিগ্ৰস্ত হৈছে। ৰাষ্ট্ৰসংঘৰ শিশু সংস্থা ইউনিচেফৰ (UNICEF) মুখপাত্ৰ জেমছ ইল্ডাৰে (James Elder) জেনেভাত সাংবাদিকৰ আগত কয়, “তুৰস্কত ভূমিকম্পৰ ফলত ক্ষতিগ্ৰস্ত হোৱা ১০খন প্ৰদেশত ৪৬ লাখ লোক আছে, ছিৰিয়াত ২৫ লাখ।”
তেওঁ লগতে কয়, “ইউনিচেফে বিশ্বাস কৰে যে ইয়াৰ মাজতে হাজাৰ হাজাৰ শিশুৰ মৃত্যু হৈছে। এতিয়াৰে পৰা মৃতকৰ সংখ্যা বৃদ্ধি পাই থাকিব। এই সংখ্যা আৰু যে বাঢ়িব তাত কোনো সন্দেহ নাই।”
