আম আদমী পাৰ্টী (AAP) অসম ৰাজ্যিক সমিতিৰ নিৰ্দেশ মৰ্মে আজি কাৰবি আংলং জিলাৰ সদৰ চহৰ ডিফুত আম আদমী পাৰ্টী কাৰবি আংলং জিলা সমিতিয়ে ঘৰুৱা আৰু বাণিজ্যিক ৰন্ধন গেছৰ মুল্য বৃদ্ধিৰ বিৰুদ্ধে এক প্ৰতিবাদী ধৰ্ণা কাৰ্যসূচী ৰূপায়ণ কৰে ৷
ডিফুস্থিত ছেমছনছিং ইংতি মেম’ৰিয়েল পাৰ্কত ‘আপ’ কাৰবি আংলং জিলা সমিতিৰ সভাপতি মিণ্টু পাটৰৰ নেতৃত্বত প্ৰতিবাদ সাব্যস্ত কৰে প্ৰতিবাদকাৰী সকলে ৷ প্ৰতিবাদকাৰী সকলে হাতে হাতে প্লে’কাৰ্ড, বেনাৰ আদি লৈ অসম চৰকাৰ হায়!
হায়, বিজেপি গ’ বেক, মূল্য বৃদ্ধি ৰোধ কৰক, ৰন্ধন গেছৰ মূল্য বৃদ্ধি ৰোধ কৰক, আম আদমী পাৰ্টী জিন্দাবাদ, অৰবিন্দ কেজৰিৱাল জিন্দাবাদ আদি শ্ল’গানেৰে প্ৰতিবাদথলী উত্তাল কৰি তোলে ৷ সাংবাদিকৰে সৈতে হোৱা বাৰ্তালাপত আম আদমী পাৰ্টী কাৰবি আংলং জিলা সমিতিৰ সভাপতি মিণ্টু পাটৰে কয়যে, বিজেপি চৰকাৰৰ শাসন কালত দৈনন্দিন ব্যৱহৃত অত্যাৱশ্যকীয় সামগ্ৰীৰ মূল্য বৃদ্ধিয়ে আকাশ চুইছে ৷
সম্প্ৰতি ঘৰুৱা আৰু ৰন্ধন গেছৰ অস্বাভাৱিক মূল্য বৃদ্ধিত সাধাৰণ জনতাৰ মূৰত ৰামটাঙুন পৰিছে ৷ মূল্যবৃদ্ধিৰ ফলত জুৰুলা হৈ পৰিছে অসমৰ লগত কাৰবি আংলঙৰ জনতা ৷ সেয়ে আম আদমী পাৰ্টীয়ে সাধাৰণ জনতাৰ হৈ আজি এই প্ৰতিবাদী ধৰ্ণা কাৰ্যসূচী ৰূপায়ণ কৰিছে বুলি কয় ৷
মূল্যবৃদ্ধি প্ৰতিৰোধৰ ক্ষেত্ৰত নিয়ন্ত্ৰণহীন জিলাখনৰ যোগান বিভাগকো জগৰীয়া কৰিছে সভাপতি গৰাকীয়ে ৷ কাৰবি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙক মূল্যবৃদ্ধি প্ৰতিৰোধ কৰিবলৈ আহ্বান জনায় নেতা গৰাকীয়ে ৷ মূল্যবৃদ্ধি প্ৰতিৰোধ নহলে আম আদমী পাৰ্টীয়ে অনাগত দিনত তীব্ৰ গণতান্ত্ৰিক আন্দোলন গঢ়ি তুলিব বুলি হুংকাৰ দিয়ে সভাপতি মিণ্টু পাটৰে ৷
