অসমৰ বাবে গৌৰৱৰ এক মুহূৰ্ত। তিনিচুকীয়া কেন্দ্ৰীয় বিদ্যালয়ৰ (Tinsukia Kendriya Vidyalaya) দশম শ্ৰেণী (Class X)ৰ ছাত্ৰ অংগৰাগ বৰকাকতী (Angarag Barkakati) ভাৰতীয় মহাকাশ গৱেষণা সংস্থাৰ (Indian Space Research Organisation) (ISRO) (ইছৰো) দ্বাৰা আয়োজিত সন্মানীয় “যুৱ বিজ্ঞানী কাৰ্যসূচী” YUVIKA-ৰ বাবে নিৰ্বাচিত (Selected) হৈছে।
এই কাৰ্যসূচীৰ লক্ষ্য হৈছে মহাকাশ প্ৰযুক্তি, মহাকাশ বিজ্ঞান আৰু মহাকাশ প্ৰয়োগৰ মৌলিক জ্ঞান প্ৰদান কৰি নৱপ্ৰজন্মক মহাকাশ কাৰ্যকলাপৰ প্ৰতি আগ্ৰহী কৰি তোলা। সমগ্ৰ দেশৰ পৰা মুঠ ৩৫০ গৰাকী ছাত্ৰ-ছাত্ৰীক এই কাৰ্যসূচীৰ বাবে নিৰ্বাচিত কৰা হৈছে। ইয়াৰে ভিতৰত অন্যতম হৈছে অংগৰাগ বৰকাকতী।
তেওঁৰ বাছনিৰ খবৰে তেওঁৰ পৰিয়াল, বিদ্যালয়, আৰু সমগ্ৰ তিনিচুকীয়া জিলালৈ আনন্দ কঢ়িয়াই আনিছে। কেন্দ্ৰীয় বিদ্যালয় তিনিচুকীয়াৰ অধ্যক্ষ সুৰজিৎ সিঙে ছাত্ৰগৰাকীৰ এই সাফল্যত গৌৰৱ প্ৰকাশ কৰি কয় যে ইছৰোৰ উদ্যোগত আয়োজিত যুৱ বিজ্ঞানী কাৰ্যসূচীৰ বাবে আমাৰ ছাত্ৰজনক নিৰ্বাচিত কৰাটো আমাৰ বাবে গৌৰৱৰ বিষয়।
উল্লেখযোগ্য যে তিনিচুকীয়াৰ অতিৰিক্ত জিলা উপাযুক্ত মঞ্জীত বৰকাকতী আৰু স্বপ্নালী বৰকাকতীৰ পুত্ৰ হৈছে অংগৰাগ বৰকাকতী। ১৪ মেʼৰ পৰা ২৭ মেʼলৈ বেংগালুৰুৰ ইউ আৰ ৰাও চেটেলাইট চেণ্টাৰত অনুষ্ঠিত হʼবলগীয়া প্ৰশিক্ষণ কাৰ্যসূচীত তেওঁ অংশগ্ৰহণ কৰিব।
