কালি সন্ধিয়া পাৰিবাৰিক সংঘাতৰ পৰিণতিত ডিফু চহৰৰ নিজৰ পত্নীৰ বায়েকক মাৰপিট কৰাৰ লগতে পত্নীৰ পিতৃ গৃহলৈ গৈ ভাবুকি দিয়াৰ লগতে নিজৰ পিষ্টলেৰে গুলী চলাই সন্ত্ৰাস চলোৱা জেষ্ঠ এচিএছ বিষয়া মুকুল কাথাৰৰ এই কাণ্ডই (Senior ACS Officer Accused of Physical Assault )এতিয়া ডিফু চহৰত জোকাৰণি তুলিছে। উল্লেখযোগ্য যে, কালি সন্ধিয়া মুকুল কাথাৰৰ পত্নীৰ বায়েকে কাথাৰে ডিফু চহৰৰ এলবিজ বেকাৰীৰ সন্মুখত গাড়ীৰ ভিতৰত তেওঁক মাৰপিট কৰাৰ গোচৰ ডিফু থানাত দখল কৰিছিল।
আনহাতে, আজি পুৱা কাথাৰৰ পত্নীৰ পৰিয়ালৰ লোকে ডিফু থানাত পুনৰ গুলী চালনাৰ সন্দৰ্ভতো এখন এজাহাৰ দাখিল কৰে। ডিফু থানাৰ ভাৰপ্ৰাপ্ত বিষয়াই ঘটনা সন্দৰ্ভত তদন্ত আৰম্ভ কৰি আজি কাথাৰৰ শহুৰেকৰ ঘৰত উপস্থিত হৈ তদন্ত আৰম্ভ কৰে। উল্লেখযোগ্য যে, কাৰ্বি আংলং স্বায়ত্বশাসিত পৰিষদৰ শীৰ্ষ পদত থকা এচিএছ বিষয়াগৰাকীৰ এনে কাণ্ডই এতিয়া সমগ্ৰ ডিফু চহৰত চৰ্চাৰ বিষয় হৈ পৰা পৰিলক্ষিত হৈছে।
আনহাতে, আজি ডিফু প্ৰেছ ক্লাবত আইৱাইইউকেএ, কেএৱাইপিঅ, এছছৱাইচিঅ, ইউপিকেএ, কেৱাইডিএ, কেইউআৰৱাইচি, এলৱাইডিচি নামৰ সামাজিক সংগঠনকেইটাই এক সংবাদমেল অনুষ্ঠিত কৰি কাথাৰৰ এনে কাণ্ডৰ তীব্ৰ গৰিহণা দিয়ে। সংগঠনকেইটাই এনে ঘটনা অবাঞ্চিত আখ্যা দি মুকুল কাথাৰৰ দৰে পৰিষদৰ এগৰাকী শীৰ্ষ বিষয়াই এনে কাম কৰিলে সাধাৰণ জনতাই কিদৰে গ্ৰহণ কৰিব বুলিও প্ৰশ্ন উত্থাপন কৰে।
এনে ঘটনাৰ পুনৰাবৃত্তি নকৰিবলৈ সকিয়াই দি পৰিষদৰ মুখ্য কাৰ্যবাহী সদস্যক ভৱিষ্যতে এনে কৰিলে কাথাৰৰ বিৰুদ্ধে কঠোৰ ব্যৱস্থা গ্ৰহণ কৰিবলৈ আহ্বান জনায়। ইপিনে, আৰক্ষীয়ে এতিয়ালৈকে কাথাৰক আটক কৰি জেৰা কৰিবলৈ সক্ষম নোহোৱা সন্দৰ্ভতো প্ৰতিক্ৰিয়া প্ৰকাশ কৰে সংগঠনকেইটাই। ডিফু আৰক্ষীয়ে কাথাৰৰ বিৰুদ্ধে ৪৩/২০২৩ গোচৰ ৰুজু কৰি আইপিচিৰ ৩৪১/৩২৩/৫০৬ ধাৰা সন্নিৱিষ্ট কৰিছে।
