অধিক অনুসৰণকাৰীৰ প্ৰয়োজন। প্ৰয়োজন আৰু অধিক লাইক। সেয়ে ‘দৌৰিবলৈ’ গৈ নৱম শ্ৰেণীৰ এজন ছাত্ৰ (Class IX Student)ই হেৰুৱাবলগা হ’ল প্ৰাণ (Lost life)। ইনষ্টাগ্ৰামত ৰিল (Reel on Instagram) বনাবলৈ ৰেʼল লাইনত দৌৰিবলৈ যাওঁতে ৰে’লৰ আগত পৰে। হায়দৰাবাদৰ (Hyderabad) সনাতনগৰত সংঘটিত হৈছে এই চাঞ্চল্যকৰ ঘটনা।
আৰক্ষীৰ সূত্ৰ অনুসৰি, মৃতকৰ নাম মহম্মদ ছৰফৰাজ। ১৬ বছৰীয়া লʼৰাজনে দুই বন্ধুৰ সৈতে ৰেʼল লাইনৰ কাষেৰে দৌৰি গৈছিল। বন্ধু এজনে ফোনত ভিডিঅ’ বনাই আছিল। দুয়োৰে মাজত জেদ লাগিছিল ৰে’লৰ সন্মুখত দৌৰাৰ।
বাকী দুজন বন্ধুৱে কাষৰ ট্ৰেকটোৰে চলন্ত ৰেʼলৰ সমান্তৰালভাৱে দৌৰি আছিল। কিন্তু ছৰফৰাজে দৌৰি আহি ৰে’লখন চলি থকা একেটা লাইনতে পৰে। ঘটনাটো ক্ষন্তেকতে সংঘটিত হয়। কিশোৰজনৰ শৰীৰ ৰেʼলৰ খুন্দাৰ ফলত ছিন্নভিন্ন (Body shattered by train) হৈ পৰে। সেই দৃশ্য ছ’চিয়েল মিডিয়াতো ভাইৰেল (scene viral on social media) হৈ পৰিছে।
তেওঁৰ দুই বন্ধুৱে ছৰফৰাজৰ ঘৰলৈ গৈ দুৰ্ঘটনাটোৰ বিষয়ে অৱগত কৰে। ততাতৈয়াকৈ ঘটনাস্থলীত উপস্থিত হয় পৰিয়ালৰ লোক আৰু স্থানীয় লোক। এই তথ্য লাভ কৰাৰ পিছতে ঘটনাস্থলীত উপস্থিত হয় আৰক্ষী। আৰক্ষীয়ে ৰেʼল লাইনৰ কাষৰ পৰা কিশোৰজনৰ ৰক্তাক্ত মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে।
ঘটনাস্থলীৰ পৰা উদ্ধাৰ কৰা হৈছে ছৰফৰাজৰ মোবাইল ফোন। প্ৰাথমিক তদন্তৰ সময়ত আৰক্ষীয়ে জানিবলৈ পায় যে এই সাহসী ভিডিঅʼ ছ’চিয়েল মিডিয়াত পোষ্ট কৰাৰ সময়ত ৰেʼল লাইনৰ কাষেৰে দৌৰি ফুৰিছিল ছৰফৰাজ আৰু তেওঁৰ বন্ধুসকলে। তাৰ পৰাই এই দুৰ্ঘটনা। ঘটনাৰ তদন্তত দুজন বন্ধুক জেৰা অব্যাহত ৰাখিছে আৰক্ষীয়ে।
