আন্তঃৰাষ্ট্ৰীয় ড্ৰাগছ সৰবৰাহকাৰী চক্ৰৰ বিৰুদ্ধে কাৰ্বি আংলং (Karbi Anglong) জিলা আৰক্ষীয়ে ধাৰাবাহিক অভিযান অব্যাহত ৰখাৰ সময়তে আজি বিয়লি জিলাখনৰ বকলীয়াঘাটত আৰক্ষী (Bakliaghat Police)য়ে অভিযান চলাই বুজন পৰিমাণৰ গাঞ্জা আৰু হেৰʼইনসহ (Ganja and Heroin) তিনিটা সৰবৰাহকাৰীক গ্ৰেপ্তাৰ (Three traffickers arrested) কৰিবলৈ সক্ষম হৈছে।
ঘটনাৰ বিৱৰণ অনুসৰি, এক গোপন সূত্ৰে লাভ কৰা তথ্যৰ ভিত্তিত আজি বিয়লি বকলীয়াঘাট থানাৰ ভাৰপ্ৰাপ্ত বিষয়া নৱজিৎ দাসৰ নেতৃত্বত আৰক্ষীৰ এটা দলে বকলীয়াঘাটৰ ৩৬নং ৰাষ্ট্ৰীয় ঘাইপথৰ ওপৰত এক বিশেষ তালাচী অভিযান চলায়।
উক্ত অভিযানত ডিমাপুৰৰ পৰা আহি থকা এএছ-০২-চি-৩৬৩৭ নম্বৰৰ যাত্ৰীবাহী বাছখনত তালাচী চলাই দুটা বেগৰ ভিতৰত চাৰিটা পেকেটৰ ভিতৰত ভৰাই অনা অৱস্থাত ২১ কিঃগ্ৰাঃ গাঞ্জা আৰু চাৰিটা চাবোনৰ বাকচত লুকুৱাই অনা অৱস্থাত ৬২ গ্ৰাম হেৰʼইন জব্দ কৰিবলৈ সক্ষম হয়।
এই সন্দৰ্ভত আৰক্ষীয়ে নগাঁও সদৰৰ কাতিমাৰী পথাৰৰ চতৰ আলি (৫০), তাফাজুৰ ইছলাম (৩০) আৰু কাছাৰ জিলাৰ শিলচৰৰ বাপা দাস (২৯) নামৰ তিনিটা সৰবৰাহকাৰীক গ্ৰেপ্তাৰ কৰি অধিক তথ্যৰ বাবে জেৰা অব্যাহত ৰাখিছে।
