ডিফু চহৰৰ পাণবাৰীত বৃহস্পতিবাৰে ৰে’লপথত এটি অচিনাক্ত পুৰুষৰ মৃতদেহ উদ্ধাৰ কৰা হয়। ৰে’ল সেতুৰ তলত জোপোহাৰ ভিতৰৰ পৰা এখন ভৰি ওলাই থকা স্থানীয় লোকে প্ৰত্যভৃক্ষ কৰে। ইয়াৰ পিছত আৰক্ষীক খবৰ দিয়ে।
আৰক্ষীয়ে আহি আনুমানিক ৪০-৪৫ বছৰ বয়সৰ পুৰুষৰ মৃতদেহটো উদ্ধাৰি কৰি ডিফু চিকিৎসা মহাবিদ্যালয় হাস্পতাললৈ মৰণোত্তৰ পৰীক্ষাৰ বাবে প্রেৰণ কৰে। মৃত ব্যক্তিজনৰ ওচৰত কোনো পৰিচয়পত্র পোৱা নাই যদিও যোৱা ১৫ ছেপ্টেম্বৰত তেওঁ ডিব্রুগড়ৰ পৰা ফৰকাটিঙলৈ কটা এটি ৰে’লৰ টিকট পোৱা গৈছে।
সেয়ে দুদিন পূৰ্বেই তেওঁৰ মৃত্যু হোৱা বুলি সন্দেহ কৰা হৈছে। আনহাতে, কি পৰিস্থিতিত তেওঁ ফৰকাটিং পাৰ হৈ ডিফু আহি পালে আৰু এইটো এটা দুর্ঘটনা নে ইয়াৰ আঁৰত অন্য কোনো ৰহস্য লুকাই আছে তাৰ ওপৰত আৰক্ষীয়ে তদন্ত অব্যাহত ৰাখিছে।
