কৰ্ণাটকত চলি আছে বিধানসভা নিৰ্বাচনৰ (Karnataka Election) ভোটগ্ৰহণ। বুধবাৰ পুৱাৰে পৰা কৰ্ণাটকৰ ২২৪টা সমষ্টিত ভোটগ্ৰহণ আৰম্ভ হৈছে। সন্ধিয়া ৬ বজালৈ চলিব। তাৰ মাজতে প্ৰধানমন্ত্ৰী নৰেন্দ্ৰ মোডীয়ে (Narendra Modi) টুইট কৰি যুৱ প্ৰজন্ম আৰু নতুন ভোটাৰক ভোট দিবলৈ অনুৰোধ জনায়।
ইফালে পুৱাৰে পৰা ভোট গ্ৰহণ কেন্দ্ৰসমূহত দীঘলীয়া শাৰী দেখা গৈছে। কৰ্ণাটক বিধানসভা নিৰ্বাচনত এইবাৰ মুঠ ভোটাৰৰ সংখ্যা ৫ কোটি ৩০ লাখ। ইয়াৰে ভিতৰত নতুন ভোটাৰৰ সংখ্যা হৈছে ১১ লাখ ৭১ হাজাৰ। পুৰুষ ভোটাৰৰ সংখ্যা ২ কোটি ৬৬ লাখ। আৰু মহিলা ভোটাৰৰ সংখ্যা ২ কোটি ৬২ লাখ।
ইতিমধ্যে কৰ্ণাটকৰ প্ৰাক্তন মুখ্যমন্ত্ৰী বি এছ য়েডিউৰাপ্পাই (B.S Yediyurappa) ভোটদান কৰিছে। ভোটদানৰ অন্তত তেওঁ কয়, “মই নিশ্চিত যে মানুহে বিজেপিক ভোট দিব। ১৩০ৰ পৰা ১৩৫খন আসন লাভ কৰি পুনৰ ক্ষমতালৈ আহিবলৈ গৈ আছে বিজেপিয়ে।” ইফালে কৰ্ণাটকৰ জনসাধাৰণক পৰিৱৰ্তনৰ বাবে ভোট দিবলৈ আহ্বান জনাইছে কংগ্ৰেছ নেত্ৰী প্ৰিয়ংকা গান্ধীয়ে। পুৱা ইনফোছিছৰ চিইঅʼ নাৰায়ণ মূৰ্তি আৰু তেওঁৰ পত্নীয়েও ভোটদান কৰে। কেন্দ্ৰীয় বিত্তমন্ত্ৰী নিৰ্মলা সীতাৰমণেও ভোটদান কৰে।
ইফালে অভিনেতা প্ৰকাশ ৰাজে সাম্প্ৰদায়িক ৰাজনীতিৰ বিৰুদ্ধে ভোট দিবলৈ আহ্বান জনায়। কংগ্ৰেছ নেতা ছিদ্দাৰমাইয়াইও পুৱা ভোটদান কৰে। কংগ্ৰেছৰ সভাপতি মল্লিকাৰ্জুন খৰ্গে, কেন্দ্ৰীয় গৃহমন্ত্ৰী অমিত শ্বাহে ৰাজ্যবাসীক ভোট দিবলৈ আহ্বান জনায়। উল্লেখ্য, ২০১৮ চনৰ বিধানসভা নিৰ্বাচনত বিজেপিয়ে ১০৪খন আসন লাভ কৰিছিল। কংগ্ৰেছে ৮০খন আসন আৰু প্ৰাক্তন প্ৰধানমন্ত্ৰী এইচ ডি দেৱগৌড়াৰ জেডি(এছ)ৰ ৩৭খন আসন।
কংগ্ৰেছৰ সৈতে নিৰ্বাচনৰ পিছত মিত্ৰতা কৰি মুখ্যমন্ত্ৰী হৈছিল দেৱেগৌড়া-পুত্ৰ কুমাৰস্বামী। কিন্তু ২০১৯ চনৰ জুলাই মাহত দুয়োটা দলৰ পৰা ডেৰ ডজনৰো অধিক বিধায়কক অপসাৰণ কৰি বিজেপিয়ে ক্ষমতা দখল কৰিছিল। এইবাৰো পুনৰ কৰ্ণাটকত ত্ৰিকোণ যুঁজ দেখা গৈছে।
