আজি বিয়লি অসম-নাগালেণ্ড সীমান্তৰ লাহৰিজান (Lahorijan)ৰ দুদু ক’লনি আৰু খানবস্তিৰ উচ্ছেদস্থলী পৰিদৰ্শন (Dudu Colony and Khanbasti visit the evacuation sites) কৰে কাৰবি আংলং স্বায়ত্তশাসিত পৰিষদৰ (KAAC) মুখ্য কাৰ্যবাহী সদস্য (CEM) তুলিৰাম ৰঙহাং (Dr.Tuliram Ranghang), বিধায়ক দৰচিং ৰংহাং আৰু ৰাজহ বিভাগৰ ইএম অমৰচিং তিচৱে৷ পৰিদৰ্শনৰ কালত চিইএম তুলিৰাম ৰংহাঙ নেতৃত্বাধীন দলটোক সংগ দিয়ে বোকাজানৰ মহকুমাধিপতি অনুপ কুমাৰ ব্ৰহ্ম আৰু মহকুমা আৰক্ষী বিষয়া জন দাসে৷ তুলিৰাম ৰংহাঙে স্থানীয় বাসিন্দাসকলৰ সৈতেও সীমান্ত এলেকা সন্দৰ্ভত মত-বিনিময় কৰে৷
সাংবাদিকৰ সৈতে হোৱা বাৰ্তালাপত মুখ্য কাৰ্যবাহী সদস্য তুলিৰাম ৰংহাঙে কয় যে, অসম-নাগালেণ্ড সীমান্তৰ সীমা সমস্যাৰ স্থায়ী সমাধানৰ স্বাৰ্থত প্ৰাকৃতিক বাউণ্ডেৰী অনুসৰি বাউণ্ডেৰী ৱাল নিৰ্মান কৰা হ’ব ৷ অসম-নাগালেণ্ড সীমান্তৰ কাৰবি আংলঙৰ ভৌগলিক সীমাৰ ভিতৰত যিসকল বেদখলকাৰীয়ে কাৰবি আংলঙৰ ভূমি বেদখল কৰিছে সেইসকলে উক্ত ভূমি এৰিবলৈ বাধ্য হ’ব লাগিব৷
আনহাতে যিসকল লোকে উক্ত এলেকাত ভূমিৰ পট্টা আছে বুলি দাবী কৰি উচ্চতম ন্যায়ালয়ত গোচৰ তৰিছে, তেওঁলোকৰ ভূমি যদিহে সেই ঠাইত আছে, সেই সকলে কাৰবি আংলঙৰ বাউণ্ডেৰীত ভূমি অধিকাৰ পাব৷ উচ্চতম ন্যায়ালয়ে পট্টা থকা লোকক উচ্ছেদ কৰাত স্থগিতাদেশ জাৰি কৰিছে৷
আনহাতে এই সন্দৰ্ভ কাৰবি আংলং স্বায়ত্তশাসিত পৰিষদে যাৱতীয় নথি-পত্ৰ স্কেনিং কৰি শপতনামাসহ ছয় সপ্তাহৰ ভিতৰত উচ্চতম ন্যায়ালয়ত জমা দিবলৈ আদেশ প্ৰদান কৰিছে বুলি জানিবলৈ দিয়ে মুখ্য কাৰ্যবাহী সদস্যগৰাকীয়ে৷ মাননীয় উচ্চতম ন্যায়ালয়ৰ আদেশ অনুসৰি যাৱতীয়-নথিপত্ৰ স্কেনিং কৰি পৰিষদে ন্যয়ালয়ত নিৰ্দিষ্ট সময়ৰ ভিতৰত জমা দিব বুলি কয়৷ ন্যায়ালয়ৰ সিদ্ধান্তই চূড়ান্ত সিদ্ধান্ত বুলি মানি লব কাৰবি আংলং স্বায়ত্বশাসিত পৰিষদে ৷
অৱশ্যে কাৰবি আংলঙ স্বায়ত্বশাসিত পৰিষদৰ সংশ্লিষ্ট বিভাগীয় কৰ্তৃপক্ষৰ সৈতে এলানি বৈঠকৰ পিছত অসম-নাগালেণ্ড সীমান্তৰ লাহৰিজানৰ দুদু কলনি খান বস্তি এলেকাত তেনে ধৰণৰ পট্টা থকাৰ কোনো ৰেকৰ্ড নাই বুলিও তাৎপৰ্যপূৰ্ণ মন্তব্য কৰে মুখ্য কাৰ্যবাহী সদস্য ডঃ তুলিৰাম ৰংহাঙে৷
