Manipur Crisis I ডেৰ মাহ ধৰি ইণ্টাৰনেটবিহীন মণিপুৰ! কমেও ৫০ হাজাৰ লোক গৃহহীন

মণিপুৰত (Manipur) প্ৰায় ডেৰ মাহ ধৰি ইণ্টাৰনেট সেৱা বন্ধ (Internet ban) হৈ আছে। ইণ্টাৰনেটৰ ওপৰত নিষেধাজ্ঞা বাঢ়িয়ে গৈ আছে। মণিপুৰ চৰকাৰে শনিবাৰে আৰু এবাৰ এই নিষেধাজ্ঞা বৃদ্ধি কৰে। ১৫ জুনৰ বিয়লি ৩ বজালৈ ৰাজ্যত ইণ্টাৰনেট সেৱা বন্ধ থাকিব।

ইফালে ইণ্টাৰনেট সেৱা বন্ধ কৰাৰ এই চৰকাৰী সিদ্ধান্তৰ বিৰুদ্ধে উচ্চতম ন্যায়ালয়ত গোচৰ ৰুজু কৰা হৈছে। উচ্চতম ন্যায়ালয়ে গোচৰৰ শীঘ্ৰে শুনানি গ্ৰহণৰ বাবে কৰা আবেদন নাকচ কৰে। ইয়াৰ পিছত শনিবাৰে পুনৰ বৃদ্ধি কৰা হয় নিষেধাজ্ঞা।মণিপুৰত হিংসাত্মক পৰিস্থিতিৰ বাবে ৩ মেʼৰ পৰা বন্ধ হৈ আছে ইণ্টাৰনেট।

সেইদিনাৰ পৰাই আৰম্ভ হৈছিল বিতৰ্ক। জনজাতি ছাত্ৰ সংগঠন সদৌ মণিপুৰ জনজাতি ছাত্ৰ সন্থাৰ (আটছুম) কাৰ্যসূচীক লৈ অশান্তিৰ সৃষ্টি হয়। ৰাজ্যিক উচ্চ ন্যায়ালয়ে ৰাজ্য চৰকাৰক মেইটেইসকলক অনুসূচিত জনজাতিৰ মৰ্যাদা দিয়াৰ বিষয়টো বিবেচনা কৰিবলৈ নিৰ্দেশ দিয়ে। ইয়াৰ পিছত অলপ সময়ৰ ভিতৰতে তাৰ বিৰোধিতা কৰি সংগঠনবোৰ ওলাই আহে। খিলঞ্জীয়া মেইটেই জনগোষ্ঠী আৰু কুকি আৰু জোকে ধৰি কিছুমান অনুসূচিত জনজাতিৰ মাজৰ সংঘৰ্ষই হিংসাৰ ৰূপ লয়।

এই পৰ্যন্ত মণিপুৰত কমেও ১০০ জন লোক এই হিংসাৰ বলি হৈছে। ৩ শতাধিক লোক আহত হয়। হিংসাৰ বাবে বহু লোক গৃহহীন হৈ পৰিছে। আনুষ্ঠানিকভাৱে সংখ্যাটো হৈছে ৫০,৬৯৮। মণিপুৰৰ এই গৃহহীন লোকসকলৰ বাবে চৰকাৰে সাহায্য শিবিৰৰ ব্যৱস্থা কৰিছে। বিশেষকৈ মহিলা, শিশু আৰু বৃদ্ধসকলৰ বাবে যাতে কোনো সমস্যা নহয় তাৰ প্ৰতি লক্ষ্য ৰাখিবলৈ চৰকাৰে নোডেল বিষয়াসকলক নিৰ্দেশ দিছে।

মণিপুৰত সংঘটিত হিংসাত্মক ঘটনাৰ তদন্ত কৰি আছে চিবিআয়ে। ডিআইজি ৰেংকৰ বিষয়াৰ নেতৃত্বত ১০ জনীয়া বিশেষ তদন্তকাৰী দল গঠন কৰিছে। মণিপুৰত ৰাজ্যপালৰ নেতৃত্বত কেন্দ্রীয় চৰকাৰে এখন শান্তি সমিতি গঠন কৰিছে৷ মণিপুৰত শান্তি ঘূৰাই অনাৰ বাবে ৰাজ্যৰ আৰক্ষী, সেনা আৰু অৰ্ধসামৰিক বাহিনীয়ে একেলগে কাম কৰি আছে।