কাৰবি আংলং জিলাৰ উপায়ুক্তৰ দায়িত্ব লোৱাৰ লগে লগে মধুমিতা ভাগৱতীয়ে জিলা পথ সুৰক্ষা সমিতিৰ মঞ্চৰ জৰিয়তে জিলাখনৰ জৰাজীৰ্ণ বাট-পথ, শোচনীয় অৱস্থা, যাতায়ত ব্যৱস্থাৰ লগতে দৈনিক বৃদ্ধি পাই অহা পথ দুৰ্ঘটনা প্ৰতিৰোধ কৰিবলৈ কেতবোৰ সুৰক্ষামূলক আৰু প্ৰশংসনীয় ব্যৱস্থা গ্ৰহণ কৰিছে ৷ পথ সুৰক্ষাৰ লগত জড়িত অংশীদাৰ সকলক ২৪ ঘণ্টাই পথ সুৰক্ষাৰ লগত সক্ৰিয় হৈ থকাৰ প্ৰতি এগৰাকী দক্ষ প্ৰশাসনিক বিষয়াৰ ভূমিকা পালন কৰি আহিছে ৷
সদ়্যহতে দেউবাৰে নিশা জাৰি কৰা এক নিৰ্দেশনাৰ জৰিয়তে উপায়ুক্ত গৰাকীৰ তেনে এক জনকল্যানমূলক সদিচ্ছাৰ কথা পোহৰলৈ আহিছে ৷ নিৰ্দেশনাটোত উপায়ুক্ত মধুমিতা ভাগৱতীয়ে কাৰবি আংলঙৰ সচেতন ৰাইজক উদ্দেশ়্য কৰি উল্লেখ কৰিছে যে, জিলাখনৰ বাট-পথ সমূহত প্ৰকাণ্ড , সৰু-বৰ গাঁত , পথৰ কাষত বা নিম্ন ভূমিত আৰু পথৰ ওপৰত জমা হোৱা পানী প্ৰত্যক্ষ কৰাৰ লগে লগে জিলা দুৰ্যোগ আৰু ব্যৱস্থাপনা কৰ্তৃপক্ষক অৱগত কৰিবলৈ আহ্বান জনাইছে ৷
পথৰ শোচনীয় আৰু জৰাজীৰ্ণ অৱস্থাই ব্যস্ততম সময়ত দূৰ্ঘটনাৰ কাৰক হব পাৰে বুলি উপায়ুক্ত গৰাকীয়ে নিৰ্দেশনাটোত আশংকা প্ৰকাশ কৰিছে ৷ এনে অৱস্থা প্ৰত্যক্ষ কৰিলে যিকোনো লোকে DEOC কাৰবি আংলঙৰ নিয়ন্ত্ৰণ কক্ষৰ ভ্ৰাম্যভাষ নম্বৰ ৯৩৯৫২৪৮১৫ আৰু ০৩৬৭১-২৭২২৪৮(১০৭৭) নম্বৰত যোগাযোগ কৰিবলৈ আহ্বান জনাইছে ৷
