ASSAM TIMES POST
কাজিৰঙাৰ পৰা কনক দেউৰী
কাৰ্বি কিংবদন্তিৰ এগৰাকী সুন্দৰী মহিয়ষী হৈছে কাজিৰ ৰংহাংপী। জনশ্ৰুতি মতে অতি সুন্দৰী
এই গৰাকী মহিয়ষীৰ নামেৰেই নামাংকিত হৈছে বিশ্ব প্ৰসিদ্ধ কাজিৰঙা ৰাষ্ট্ৰীয় উদ্যানৰ নাম
এশিঙীয়া গঁড়ৰ বাবে অসম বিশ্ববিখ্যাত আৰু অসমৰ ভিতৰত ইয়াৰে অন্যতম হৈছে কাজিৰঙা। কিন্তু এই কাজিৰঙা নামটোৰ নামাকৰণৰ ইতিহাস কি? উল্লেখযোগ্য যে কাৰ্বি কিংবদন্তিৰ এগৰাকী সুন্দৰী মহিয়ষী হৈছে কাজিৰ ৰংহাংপী। জনশ্ৰুতি মতে অতি সুন্দৰী এই গৰাকী মহিয়ষীৰ নামেৰেই নামাংকিত হৈছে বিশ্ব প্ৰসিদ্ধ কাজিৰঙা ৰাষ্ট্ৰীয় উদ্যানৰ নাম।
জীৱ জন্তুক অতিশয় মৰম কৰাৰ বাবেই ঈশ্বৰে কাজিৰৰ হাতত সৰগৰ পৰা দি পঠিয়াইছিল এটি গঁড়ৰ পোৱালী। পৃথিৱীত খাদ্য শষ্য ৰোপনৰ বাবেও সৰগৰ পৰা কঠিয়া লৈ আহিছিল কাজিৰ ৰংহাংপীয়ে। সেয়ে এনে এগৰাকী অলৌকিক-দৈৱিক শক্তিসম্পন্ন কাৰ্বি কিংবদন্তিৰ মহিয়ষী কাজিৰ ৰংহাংপীৰ স্মৃতিক চিৰযুগমীয়া কৰাৰ উদ্দেশ্যে প্ৰতি বছৰে ৫ ডিচেম্বৰ দিনটোত কাৰ্বি আংলং স্বায়ত্ত শাসিত পৰিষদে কহৰাত বিভিন্ন কাৰ্যসূচী ৰূপায়নেৰে কাজিৰ ৰংহাংপীক স্মৰণ কৰি অহাৰ লগতে উন্নয়ন সাধনৰ পদক্ষেপ গ্ৰহণ কৰি আহিছে কাৰ্বি পৰিষদে। আৰু নৱ প্ৰজন্মৰ মাজত নাৰী গৰাকীৰ মহান উদ্দেশ্যক প্ৰচাৰ আৰু প্ৰসাৰ কৰাৰ লগতে গড় সুৰক্ষাৰ বাবে পৰিষদে এলানী বিশেষ পদক্ষেপ গ্ৰহণ কৰিছে।
কাৰ্বি আংলং স্বায়ত্ত শাসিত পৰিষদখনে এইবাৰ কিছু ইতিবাচক পদক্ষেপ গ্ৰহণ কৰিছে। পৰিষদৰ মুখ্য কাৰ্যবাহী সদস্য তুলিৰাম ৰংহাঙে কাজিৰ ৰংহাংপীৰ স্মৃতি দিৱসত কাৰ্বি আংলঙৰ অন্তৰ্গত থকা কাজিৰঙাৰ সকলো অঞ্চল সুৰক্ষাৰ বাবে যাৱতীয় সকলোধৰণৰ ব্যৱস্থা গ্ৰহণ কৰিব বুলি প্ৰতিশ্ৰুতি দিছে। সকলো বেদখল ৰোধ কৰাৰ লগতে চোৰাং চিকাৰীৰ গঁড় নিধন ৰোধ কৰাৰ বাবে গুৰুত্বপূৰ্ণ ভূমিকা পালন কৰিব আৰু কাজিৰঙা উন্নয়নৰ বাবে কাৰ্বি পৰিষদে পৰ্যাপ্ত ধন ধাৰ্য কৰিব বুলিও মন্তব্য কৰে তুলিৰাম ৰংহাঙে।
লগতে কাজিৰঙাত কাজিৰ ৰংহাংপীৰ নামত বিভিন্ন ব্যৱস্থা সম্বলিত এটি সুন্দৰ অতিথিশালা নিৰ্মাণ কৰিব বুলিও প্ৰকাশ কৰে ৰংহাঙে। অনুষ্ঠিত স্মৃতি স্মৰণ অনুষ্ঠানত কাৰ্বি পৰিষদৰ কাৰ্য্যবাহী সদস্যসকল, পৰিষদীয় সদস্যসকলৰ লগতে সহস্ৰাধিক স্থানীয় ৰাইজ উপস্থিত থাকে। গুৰুত্বপূৰ্ণ যে স্মৃতি স্মৰণ অনুষ্ঠানৰ লগত সংগতি ৰাখি শিক্ষাৰ্থীৰ মাজত চিত্ৰাংকণ, পৰম্পৰাগত খেল আদি প্ৰতিযোগিতাৰো আয়োজন কৰে উদ্যোগতাই।
